मराठी मनोरंजन

ई-टीव्ही मराठीवर ‘हृदयी प्रीत जागते’
ई-टीव्ही मराठीवर ९ जून पासून ‘हृदयी प्रीत जागते’ ही नवी मालिका सुरू होणार आहे. ही मालिका संगीतमय प्रेमकथा आहे. विरेन प्रधान यांच्या ‘पिकालो फिल्म्स’ने या मालिकेची निर्मिती केली आहे. सोमवार ते शनिवार या दिवशी दररोज रात्री दहा वाजता ही मालिका प्रसारित होणार आहे. सुहास जोशी, बाळ कर्वे, अंगद म्हसकर, नवोदित अभिनेत्री स्नेहा देशमुख हे कलाकार मालिकेत आहेत.
रामदास मेनन यांचा ‘चिरंजीव’
मुंबई सिने इंटरनॅशनलतर्फे रामदास मेनन ‘चिरंजीव’ या चित्रपटाची निर्मिती करत असून रमेश मोरे हे चित्रपटाचे दिग्दर्शक आहेत. चित्रपटात अभिनेता भरत जाधव, अलका कुबल, किशोर कदम, भार्गवी चिरमुले, सुहासिनी देशपांडे हे प्रमुख कलाकार आहेत. रोहित हा नवोदित अभिनेता या चित्रपटातून रुपेरी पडद्यावर पदार्पण करत आहे. मेनन यांनी आत्तापर्यंत मल्याळी भाषेत चित्रपट आणि दूरदर्शन मालिकांची निर्मिती केली आहे. या चित्रपटाच्या निमित्ताने त्यांनी मराठी रुपेरी पडद्यावर पाऊल टाकले आहे. श्रद्धा आणि अंधश्रद्धा यातील संघर्ष यात दाखविण्यात आला आहे. कोकणातील गुहागर, पालशेत, हेदवी येथे चित्रपटाचे चित्रीकरण केले जाणार आहे.
‘अश्लील वारे’ रंगभूमीवर
किशोरवयीन मुलांच्या मानसिक कोंडीला वाट मोकळी करून देणारे आणि त्यांच्या समस्यांचा वेध घेणारे ‘अश्लील वारे’ हे नाटक रंगभूमीवर दाखल झाले आहे. स्मित आणि अर्चना थिएटर प्रस्तुत या नाटकाची निर्मिती राम भाटले आणि राखी भाटले यांनी केली आहे. नाटकाचे लेखन संकेत तटकरे तर दिग्दर्शन संदीप तटकरे यांचे आहे. शेखर दाते हे नाटकाचे निर्मिती प्रमुख असून नाटकात संकेत तटकरे, प्रियंका शेटय़े, प्रतिक्षा पोटे, राकेश राऊत, संदीप तटकरे यांच्या प्रमुख भूमिका आहेत.
‘सामथ्र्य’चित्रपटातील गाणी प्रकाशित
स्वयंभू प्रॉडक्शन निर्मित ‘सामथ्र्य’ या आगामी मराठी चित्रपटातील गाण्यांच्या ध्वनिफीतीचे प्रकाशन नुकतेच मुंबईत एका कार्यक्रमात झाले. राजेश सावंत व प्रणय अढांगळे यांनी चित्रपटातील काही गाणी संगीतबद्ध केली असून ती स्वप्नील बांदोडकर, नेहा राजपाल, राहुल वैद्य, कुणाल गांजावाला यांनी गायली आहेत. चित्रपटाचे दिग्दर्शन चंद्रशेखर सांडवे यांनी केले आहे. अरुण नलावडे, आसावरी जोशी, विनय आपटे, नुकल घाणेकर आदी कलाकार चित्रपटात आहेत.
 रुपेरी पडद्यावर ‘दगडी चाळ’
संगीता अहिर प्रस्तुत साईपूजा फिल्म्स अ‍ॅण्ड एन्टरटेंटमेंट यांच्यातर्फे ‘दगडी चाळ’ या चित्रपटाचा मुहूर्त नुकताच झाला. सुरेश सावंत व अमोल काळे यांनी चित्रपटाची निर्मिती केली आहे. चित्रपटाचे दिग्दर्शन प्रवीण कारळे यांचे आहे. पटकथा व संवाद आदेश के अर्जून यांचे तर संगीत अमितराज यांचे आहे.