मुकेश अंबानी हे जगातील श्रीमंत उद्योजकांपैकी एक आहेत. संपूर्ण अंबानी कुटुंब नेहमीच विविध कारणांनी चर्चेत असतं. मुकेश व नीता अंबानी असो किंवा त्यांची मुलं असोत; ते नेहमीच देवाच्या चरणी नतमस्तक होताना दिसतात. आज मुकेश अंबानी यांनी त्यांचा मुलगा, सून व नातवासह सिद्धिविनायकाचं दर्शन घेतलं आहे.
मुकेश अंबानी त्यांचा मुलगा आकाश अंबानी, सून श्लोका अंबानी व त्यांचा नातू पृथ्वी अंबानी यांच्याबरोबर आज दुपारी सिद्धिविनायकाच्या दर्शनासाठी आले होते. या वेळेचा त्यांचा व्हिडीओ सोशल मीडियावर खूप व्हायरल होत आहे. सिद्धिविनायकाच्या दर्शनाला जाताना त्यांच्या साधेपणाने सर्वांचंच लक्ष वेधलं आहे.
मुकेश अंबानी व आकाश अंबानी यांनी सिद्धिविनायकाच्या दर्शनाला जाताना पांढऱ्या रंगाचा झब्बा परिधान केला होता. तर आकाश अंबानीची पत्नी श्लोका अंबानी हिने पांढऱ्या रंगाचा साधा ड्रेस व त्यावर गुलाबी रंगाची ओढणी परिधान केली होती. या वेळी मुकेश अंबानी त्यांच्या नातवाला कडेवर घेऊन चालताना दिसले.
आता त्यांचा हा व्हिडीओ चांगलाच चर्चेत आला आहे. सिद्धिविनायकाच्या दर्शनाला जातानाचा त्यांचा साधेपणा नेटकऱ्यांना चांगलाच भावला आहे. या व्हिडीओवर कमेंट करत एका नेटकऱ्याने लिहिलं, “अंबानी किती साधे राहतात. आपल्या नातवाला कडेवर घेऊन ते देवळात जात आहेत.” तर आणखी एक नेटकरी म्हणाला, “खरोखर… खूपच नम्र.” तर आणखी एका नेटकऱ्याने लिहिलं, “खूप कौतुकास्पद आहे… ते त्यांच्या नातवावर खूप चांगले संस्कार करत आहेत.”
