Sobhita Dhulipala and Naga Chaitanya Engagement Date : दाक्षिणात्य कलाविश्वातील सुपरस्टार अभिनेता नागा चैतन्य आणि अभिनेत्री सोभिता धुलीपाला यांचा साखरपुडा आज ( ८ ऑगस्ट ) पार पडला आहे. नागा चैतन्यचे वडील नागार्जुन यांनी सोशल मीडियावर फोटो शेअर करत याबद्दल माहिती दिली आहे. नागा चैतन्यच्या हैदराबाद येथील राहत्या घरी हा कार्यक्रम पार पडला. अभिनेते नागार्जुन यांनी दोघांचे एकत्र फोटो शेअर करत याखाली खास कॅप्शन लिहिलं आहे.
नागार्जुन मुलाच्या साखरपुड्याचे फोटो शेअर करत लिहितात, “माझा मुलगा नागा चैतन्य आणि सोभिता धुलीपाला यांचा साखरपुडा आज सकाळी ९ वाजून ४२ मिनिटांनी आमच्या घरी पार पडला. सोभिताचं आमच्या कुटुंबात स्वागत करताना मला खूप आनंद होत आहे. तुम्हा दोघांना पुढील आयुष्यासाठी खूप खूप शुभेच्छा! 8.8.8 म्हणजेच अनंत प्रेमाची सुरुवात…” नागार्जुन यांच्या कॅप्शनने सध्या सर्वांचं लक्ष वेधून घेतलं आहे. यामध्ये त्यांनी ‘8.8.8’ असा उल्लेख केल्याने याचा नेमका अर्थ काय याबद्दल प्रत्येकाच्या मनात उत्सुकता निर्माण झालेली आहे.
हेही वाचा : नागा चैतन्यने अभिनेत्री सोभिता धुलीपालाशी केला साखरपुडा, नागार्जुन यांनी फोटो केले शेअर
साखरपुड्यासाठी ८ ऑगस्ट तारीख निवडण्यामागे आहे खास कारण
नागा चैतन्य व सोभिता ( Sobhita Dhulipala and Naga Chaitanya ) यांनी साखरपुडा करण्यासाठी ८ ऑगस्ट या दिवसाची निवड करण्यामागे काही विशेष कारणं आहेत. ‘8.8.8’ म्हणजेच, ‘आजची तारीख ८, ऑगस्ट हा आठवा महिना आणि २०२४ या वर्षाची बेरीज केल्यास ८ येते’ त्यामुळे अंकशास्त्र आणि ज्योतिषशास्त्रात हा दिवस खूप महत्त्वाचा आहे. याबद्दल डॉ. नीती कौशिक यांनी माहिती दिली आहे. त्या अध्यात्माविषयी त्यांच्या युट्यूब चॅनेलवर माहिती देत असतात. त्या सांगतात, “ऑगस्ट महिन्यात एक ज्योतिषीशास्त्रीय घटना घडते याला ‘लायन गेट पोर्टल’ म्हणून ओळखलं जातं. हे एक खगोलीय संरेखन आहे यामुळे पृथ्वी, सिरियस तारा आणि ओरियन नक्षत्र एका रांगेत येतात. ‘लायन गेट पोर्टल’ हे सिंह राशीशी संबंधित आहे. याशिवाय सिरियस हा आकाशातील सर्वात तेजस्वी तारा आहे. आजचा दिवस संख्याशास्त्र व ज्योतिषशास्त्रानुसार महत्त्वाचा आहे यादिवशी वैयक्तिक वाढ होण्यास मदत होते…आपण ज्या गोष्टी मॅनिफेस्ट करतो त्या पूर्ण होऊ शकतात. त्यामुळे हा दिवस महत्त्वाचा मानला जातो.”
सोभिता आणि चैतन्य ( Sobhita Dhulipala and Naga Chaitanya ) यांच्या साखरपुड्याला केवळ जवळचे कुटुंबीय व काही मोजकी मित्रमंडळी उपस्थित होती. यापूर्वी नागा चैतन्यचे समंथाशी लग्न झाले होते. २०१७ मध्ये दोघंही विवाहबंधनात अडकले होते. परंतु, २०२१ मध्ये दोघांनी घटस्फोट घेतला. यानंतर सोभिता आणि नागा यांच्या प्रेमकहाणीची सुरुवात झाली.
"We are delighted to announce the engagement of our son, Naga Chaitanya, to Sobhita Dhulipala, which took place this morning at 9:42 a.m.!!
— Nagarjuna Akkineni (@iamnagarjuna) August 8, 2024
We are overjoyed to welcome her into our family.
Congratulations to the happy couple!
Wishing them a lifetime of love and happiness. ?… pic.twitter.com/buiBGa52lD
२०२१ नंतर नागा आणि सोभिता ( Sobhita Dhulipala and Naga Chaitanya ) यांना एकत्र परदेशात देखील फिरताना पाहण्यात आलं होतं. परंतु, दोघांनीही त्यांच्या नात्याची अधिकृतपणे घोषणा केलेली नव्हती. अखेर नागार्जुन यांनी सोशल मीडियावर फोटो शेअर करत चैतन्य आणि सोभिता यांच्या साखरपुड्याची माहिती सर्वांना दिली. आता हे दोघं विवाहबंधनात केव्हा अडकणार याकडे चाहत्यांचं लक्ष लागलेलं आहे.
