Akhil Akkineni Engaged to Zainab Ravdjee : प्रसिद्ध तेलुगू अभिनेता नागा चैतन्य अभिनेत्री सोभिता धुलिपालाशी दुसरं लग्न करणार आहे. ४ डिसेंबरला चैतन्य व सोभिता लग्नबंधनात अडकतील. त्यांच्या लग्नाआधी चैतन्यच्या सावत्र भावाने आनंदाची बातमी दिली आहे. नागार्जुन अक्किनेनी यांचा धाकटा मुलगा अभिनेता अखिल अक्किनेनीचा साखरपुडा झाला आहे.
अखिलने सोशल मीडियावर फोटो शेअर करून साखरपुडा केल्याची माहिती दिली. अखिलने त्याच्या इन्स्टाग्राम व फेसबुक अकाउंटवर तीन फोटो पोस्ट केले आहेत. “माझा आणि झैनब रावदजीचा साखरपुडा झाला आहे, हे सांगताना मला खूप आनंद होत आहे,” असं कॅप्शन अखिलने या फोटोंना दिलं आहे.
हेही वाचा – Video: प्रसिद्ध बॉलीवूड अभिनेत्याने २७ व्या वर्षी उरकला साखरपुडा; सुंदर व्हिडीओ शेअर करून दिली गुड न्यूज
अखिल अक्किनेनीची पोस्ट –
अखिल अक्किनेनीने २०१६ मध्ये श्रिया भुपलशी साखरपुडा केला होता. त्यावेळी अखिल अवघ्या २२ वर्षांचा होता. मात्र लग्न होण्याआधीच त्यांचं नातं तुटलं. अखिल व श्रिया यांचं हैदराबाद विमानतळावर जोरदार भांडण झालंं होतं आणि लग्नाला अवघे काही दिवस बाकी असतानाच ते २०१७ मध्ये वेगळे झाले होते. आता ८ वर्षांनी अखिलने त्याची गर्लफ्रेंड झैनबशी साखरपुडा केला आहे. सावत्र भावाच्या लग्नाआधी त्याने चाहत्यांना ही आनंदाची बातमी दिली. अखिलने साखरपुड्याच्या पोस्ट्सच्या कमेंट्स बंद केल्या आहेत.
हेही वाचा – प्राजक्ता माळीचा देवावर विश्वास आहे का? चाहत्याच्या प्रश्नाचं एका शब्दात दिलं उत्तर, म्हणाली…
८ एप्रिल १९९४ रोजी अमेरिकेत जन्मलेला अखिल ३० वर्षांचा आहे. तो अवघ्या वर्षभराचा होता तेव्हा तो १९९५ मध्ये वडील नागार्जुन यांच्या ‘सिसिंदरी’ या चित्रपटात बालकलाकार म्हणून झळकला होता. त्याने अमेरिकेतील न्यूयॉर्क येथील ली स्ट्रासबर्ग थिएटर अँड फिल्म इन्स्टिट्यूटमधून अभिनयाचे शिक्षण घेतले आहे. त्याने २०१५ मध्ये आलेल्या ‘अखिल’ चित्रपटातून मुख्य अभिनेता म्हणून पदार्पण केलं. त्याचा हा पदार्पणाचा चित्रपट बॉक्स ऑफिसवर फ्लॉप ठरला.
त्यानंतर अखिलचे ‘हॅलो’ आणि ‘मिस्टर मजनू’ हे चित्रपट रिलीज झाले पण तेही बॉक्स ऑफिसवर चांगली कामगिरी करू शकले नाही. २०२१ मध्ये प्रदर्शित झालेल्या ‘मोस्ट एलिजिबल बॅचलर’ हा त्याचा चित्रपट हिट झाला होता. त्याच्या ९ वर्षांच्या करिअरमधील हा एकमेव हिट चित्रपट आहे.
© IE Online Media Services (P) Ltd