मराठी चित्रपटसृष्टीत सध्या अनेक नवनवीन प्रयोग होत असून आपली थेट स्पर्धा हिंदीशी आहे. महेश मांजरेकरला या गोष्टीचे भान सतत असते. त्यामुळे तो हिंदीच्या तोडीची निर्मितीमूल्ये असलेले चित्रपट तयार करत असतो. सुदैवाने हिंदीतील अनेक चित्रपटकर्त्यांचा कल भिकार चित्रपट तयार करण्याकडे आहे. त्यामुळे मराठीतच जीव रमतो, असे परखड मत अभिनेता सचिन खेडेकर याने मांडले. ‘कोकणस्थ’ या आगामी चित्रपटाच्या निमित्ताने ‘वृत्तांत’शी बोलताना सचिनने दोन्ही चित्रपटसृष्टींतील फरक अधोरेखित केला.
‘कोकणस्थ’ या चित्रपटाच्या निमित्ताने मराठी चित्रपट पहिल्यांदाच स्वित्र्झलडला पोहोचला आहे. महेश मांजरेकर हा आपला मित्र नेहमीच महत्त्वाकांक्षी चित्रपट करण्यावर भर देतो. मराठी चित्रपटांची स्पर्धा थेट हिंदी चित्रपटांशी आहे. मात्र सुदैवाने हिंदीत अनेक चांगले चांगले निर्माते भिकार चित्रपट करण्यात गुंतले आहेत. या भिकार चित्रपटांपेक्षा मराठीत होणारे नवनवीन प्रयोग केव्हाही चांगले आहेत. आपल्यासाठी हे नक्कीच स्वागतार्ह आहे, असे सचिनने सांगितले.
गेल्या वर्षभरात ‘काकस्पर्श’, ‘आजचा दिवस माझा’, ‘आयना का बायना’, ‘प्रेम म्हणजे प्रेम म्हणजे प्रेम असतं!?’ अशा एकापेक्षा एक सरस चित्रपटांद्वारे आपले अभिनयाचे नाणे खणखणीत वाजवणारा सचिन एका वेगळ्याच भूमिकेत ‘कोकणस्थ’मधून प्रेक्षकांसमोर येत आहे. या चित्रपटात सचिन ‘रामचंद्र गोविंद गोखले’ या सामान्य माणसाची भूमिका करत असून वैयक्तिक आयुष्यात झालेल्या उलथापालथीमुळे समाजकंटकांचा बिमोड करण्यासाठी पेटून उठलेला सामान्य माणूस सचिनने रंगवला आहे.
