‘प्रेम’ या शब्दाचा प्रत्येक जण आपल्या सोयीने अर्थ काढत असतो. प्रेमाची व्याख्या, प्रेमाची रूपे देखील सर्वासाठी वेगळी असतात. काहीशा ह्याच संकल्पनेवर आधारित ‘प्रेमवारी’ हा चित्रपट लवकरच प्रेक्षकांच्या भेटीस येत आहे. नुकतच या चित्रपटाचं पोस्टर प्रदर्शित झालं आहे. शिर्डी येथे साईबाबाच्या चरणी या पोस्टरचं अनावरण करण्यात आलं.
प्रदर्शित झालेल्या पोस्टरवर चित्रपटातील मुख्य कलाकार चिन्मय उदगीरकर आणि मयुरी कापडणे दिसत असून हा रोमॅण्टीक चित्रपट असल्याचं पाहायला मिळत आहे. हा चित्रपट ८ फेब्रुवारी रोजी प्रेक्षकांच्या भेटीला येणार आहे.
या चित्रपटातून मयुरीच्या रूपाने मराठी सिनेसृष्टीत एक नवीन चेहरा येत आहे. साईममित प्रोडक्शन प्रायव्हेट लिमिटेड निर्मित ‘प्रेमवारी’ या आगामी चित्रपटाद्वारे प्रेमाची नवी परिभाषा लोकांसमोर येणार आहे, या चित्रपटाला मराठी चित्रपटसृष्टीतील प्रसिद्ध संगीतदिग्दर्शक अमितराज याने संगीत दिले. तर या सुंदर चित्रपटाचे लेखन,निर्मिती आणि दिग्दर्शन राजेंद्र कचरू गायकवाड यांनी केले असून, प्रस्तुतकर्त्याची धुरादेखील त्यांनीच सांभाळली आहे.
