मुंबईतील नीता मुकेश अंबानी कल्चरल सेंटरला एक वर्ष पूर्ण झालं आहे. या वर्षपूर्तीनिमित्त खास कार्यक्रमाचं आयोजन करण्यात आलं होतं. या कार्यक्रमात मराठमोळ्या गायक संगीतकारांची जोडी अजय-अतुलने खास सादरीकरण केलं. तर नीता अंबानी यांनी नेसलेल्या पैठणीने लक्ष वेधून घेतलं.
वर्षपूर्तीनिमित्त आयोजित करण्यात आलेल्या कार्यक्रमात नीता अंबानी यांच्या मराठमोळ्या लूकने उपस्थितांचं लक्ष वेधलं. त्यांनी हाताने विणलेली आकाशी रंगाची सुंदर महाराष्ट्रीय पैठणी या कार्यक्रमात नेसली होती. जरीचा काठ असलेल्या या पैठणीवर सुंदर फूलांची व मोरांची डिझाईन होती. कपाळावर चंद्रकोर, पैठणी आणि दागिने या लूकमध्ये नीता अंबानी सुंदर दिसत होत्या.
“आपल्या देशाचे आणि संस्कृतीचे नाव संपूर्ण जगात उज्वल व्हावे, हा आमचा प्रयत्न आहे. तुम्ही आहात म्हणूनच या सर्व कला जिवंत आहेत, तुम्ही आहात म्हणून भारतीय संस्कृतीचा वारसा जिवंत आहे,आणि तुम्ही आहात म्हणूनच नीता मुकेश अंबानी कल्चरल सेंटर आहे,” असं नीता अंबानी या कार्यक्रमात प्रेक्षकांना मराठीत म्हणाल्या.
पुरस्कार विजेती जोडी अजय-अतुल यांनी द ग्रँड थिएटरमध्ये इनडोअर लाइव्ह ऑर्केस्ट्राबरोबर त्यांची अप्रतिम गाणी सादर केली. अगदी ‘देवा श्री गणेशा’ सारख्या भक्ती गीतापासून ते ‘झिंगाट’ सारखी अनेक सुपरहिट गाणी त्यांनी गायली आणि उपस्थितांचं मनोरंजन केलं. “हे दोघे भाऊ संगीत वेडाने झपाटलेले आहेत, मी त्यांच्याबरोबर काम केलं आहे म्हणून मला माहित आहे की ते केवळ चांगले कलाकारच नाही तर खूप चांगले व्यक्तीही आहेत,” असं नीता अंबानी अजय अतुलबद्दल म्हणाल्या.
