दाक्षिणात्य सुपरस्टार राम चरण काही दिवसांपूर्वीच बाबा झाला आहे. राम चरणीची पत्नी उपासना कमिनेनी २० जूनला एका गोंडस मुलीला जन्म दिला. राम चरण आणि त्याच्या पत्नीला कन्यारत्न प्राप्त झाल्यावर सर्वत्र त्याच्यावर अभिनंदन असा वर्षाव होत आहे. आता अशातच मुकेश व नीता अंबानी यांनी राम चरणच्या लेकीसाठी एक खास भेट पाठवली आहे.
राम चरण बाबा झाल्यावर ‘आरआरआर’चे गायक काला भैरव यांनी राम चरणच्या मुलीसाठी एक खास धून तयार केली. तर याचबरोबर अनेकांकडून त्यांना भेटवस्तू मिळाल्या. आता व्यावसायिक मुकेश अंबानी आणि नीता अंबानी यांनी राम चरणच्या लेकीसाठी आशीर्वादरुपी एक अत्यंत महागडी भेट पाठवल्याचं समोर आलं आहे.
मीडिया रिपोर्टनुसार, मुकेश अंबानी व नीता अंबानी यांनी राम चरणच्या लेकीसाठी सोन्याचा पाळणा भेट म्हणून दिला आहे. हा सोन्याचा पाळणा खूप महाग आहे. याची किंमत १ कोटी असल्याचं बोललं जात आहे. पण अद्याप याबद्दल कोणतीही अधिकृत माहिती समोर आलेली नाही. पण अंबानींनी पाठवलेल्या या भेटीबद्दल कळल्यावर नेटकऱ्यांच्या भुवया उंचावल्या आहेत.
दरम्यान, अभिनेता राम चरणच्या मुलीचं आज बारसं होणार आहे. गेल्या काही दिवसांपासून त्यांच्या घरी बारशाची जय्यत तयारी सुरू आहे. ती दोघं त्यांच्या लेकीचं नाव काय ठेवणार याची आता त्याच्या चाहत्यांना प्रचंड उत्सुकता आहे.
