कलाविश्व आणि चित्रपटसृष्टीतील मानाचा समजला जाणारा पुरस्कार म्हणून ऑस्कर ओळखला जातो. चित्रपटातील दिग्गजांपासून ते अगदी बालकलाकारांपर्यंत सर्वांच्याच मनात या पुरस्कारासाठी एक विशेष स्थान असते. सिनेसृष्टीतील सर्वोच्च पुरस्कार म्हणून गौरवला जाणाऱ्या ९५ व्या ऑस्कर पुरस्कार सोहळा नुकताच पार पडला. ‘आरआरआर’ चित्रपटातील ‘नाटू नाटू’ गाण्याला पुरस्कार मिळालाच पण मलेशियन अभिनेत्री मिशेल योह हिला उत्कृष्ट अभिनेत्रीचा पुरस्कार मिळाला आहे.
ऑस्करच्या ९५ वर्षाच्या इतिहासात मिशेल योह ही पहिली आशियातील अभिनेत्री आहे जिने उत्कृष्ट अभिनेत्रीचा पुरस्कार पटकावला आहे. या अभिनेत्रीने मागे एका मुलाखतीमध्ये बॉलिवूडच्या एका अभिनेत्याबद्दल भाष्य केलं होतं. तो अभिनेता म्हणजे आमिर खान. ती असं म्हणाली “मी आमिर खानबरोबर कधीच काम केलं नाही. आम्ही दोघेही एका एनजीओचे ब्रँड अॅम्बेसेडर आहोत ज्याचं नाव आहे लिव्ह टू लव्ह, पर्यावरण वाचविण्याविषयी एनजीओ काम करतो.”
ती पुढे म्हणाली, “मी त्याची मोठी चाहती आहे. तो एक अविश्वसनीय अभिनेताच नव्हे तर मोठ्या मनाचा माणूस आहे. मला आशा आहे की मला लवकरच त्याच्याबरोबर काम करण्याची संधी मिळेल.” आमिरचं कौतुक करताना ती पुढे म्हणाली, “मी आमिरचा एक चित्रपट पाहिला आहे. तो चित्रपट म्हणजे दुसरा तिसरा कोणी नसून ‘३ इडियट्स’ होता. ज्याची चर्चा जगभरात झाली होती.”
आमिर खानने आजवर अनेक सुपरहिट चित्रपट दिले आहेत. त्याच्या ‘दंगल’ चित्रपटाची चर्चा मोठ्या प्रमाणावर झाली होती. विशेषतः चीनमध्ये आमिर खानचे असंख्य चाहते आहेत. मागच्या वर्षी प्रदर्शित झालेल्या ‘लाल सिंग चड्ढा’ हा चित्रपट बॉक्स ऑफिसवर चालला नाही. सध्या आमिरने चित्रपटसृष्टीतून ब्रेक घेतला आहे.
