Oscars 2019 : रॅमी मॅलेक ठरला सर्वोत्कृष्ट अभिनेता

अभिनेता रॅमी मॅलेकने या चित्रपटात फ्रेडी मर्क्युरी ही व्यक्तिरेखा साकारली आहे. वरकरणी सामान्य वाटणारी ही भूमिका नक्कीच आव्हानात्मक होती. परंतु संपूर्ण चित्रपट जणू त्याच्याच भोवती फिरावा इतका रॅमी त्या व्यक्तिरेखेशी एकरुप झालेला दिसतो. एक अभिनेता म्हणून रॅमीची कारकीर्द फार मोठी नाही परंतु कोणत्याही पूर्वग्रहाला बळी न पटता त्याने दाखवलेली त्याच्या अभिनयावरची पकड, भूमिकेचा अभ्यास आणि पडद्यावरच्या त्याच्या बारीकसारीक हालचाली या नक्कीच कौतुकास्पद आहेत. चित्रपटाच्या आशयातील मर्म त्याच्या सादरीकरणात परावर्तीत झालेले दिसते. थोडक्यात काय तर उत्कृष्ट अभिनयाचे सुरेख प्रदर्शन रॅमी मॅलेकने केले आहे. आणि म्हणूनच सर्वोत्कृष्ट अभिनेता पुरस्काराचा तो मानकरी ठरला.