‘बिग बॉस ओटीटी २’ विजेता व लोकप्रिय युट्यूबर एल्विश यादव सतत कुठल्या ना कुठल्या वादामुळे चर्चेत असतो. एका बाजूला रेव्ह पार्टीमध्ये सापाचं विष पुरवठा केल्याचं प्रकरण तर दुसऱ्या बाजूला नवनवीन वादाच्या भोवऱ्यात एल्विश अडकताना दिसत आहे. काही दिवसांपूर्वी त्याचा जयपूरमधील एका रेस्टॉरंटमधला व्हिडीओ सोशल मीडियावर व्हायरल झाला होता. ज्यामध्ये एल्विश एका व्यक्तीला जोरात कानशिलात लगावताना दिसला होता. त्यानंतर आता एल्विशने गुरुग्राममध्ये राहणाऱ्या लोकप्रिय युट्यूबर सागर ठाकूर उर्फ मॅक्सटर्नला बेदम मारहाण केल्याचं समोर आलं आहे.
अलीकडेच युट्यूबर मॅक्सटर्नने सोशल मीडियावर एल्विश यादवने मारहाण केल्याचा व जीवे मारण्याची धमकी दिल्या आरोप केला होता. पण यावर कोणाचाही विश्वास बसला नाही. त्यामुळे मॅक्सटर्नने आता मारहाण करतानाचा सीसीटीव्ही फुटेज शेअर केला आहे. ज्यामुळे सोशल मीडियावर एकच खळबळ उडाली आहे. या व्हिडीओत, एल्विश आपल्या ८ ते १० मित्रांना घेऊन मॅक्सटर्नकडे पोहोचून, त्याला बेदम मारहाण करताना दिसत आहे. या मारहाणामुळे मॅक्सटर्न जखमी झाला आहे, याचा देखील व्हिडीओ त्याने शेअर केला आहे. या व्हिडीओनंतर ‘एक्स’वर एल्विशला ट्रोल केलं जात आहे. गुंडा असा हॅशटॅग सध्या ट्रेंड होतं आहे. नेटकरी एल्विशविरोधात कठोर कारवाई करण्याची मागणी करत आहे. पण हे नेमकं प्रकरण काय आहे? जाणून घ्या..
हेही वाचा – Video: अंबानींची धाकटी सून शाहरुख खानला म्हणाली ‘अंकल’, बादशहाने अक्षय कुमारचं नाव घेत दिली ‘ही’ रिअ‍ॅक्शन
काही दिवसांपूर्वी एल्विश यादव व मुनव्वर फारुकी एका क्रिकेट सामन्यात एकत्र दिसले होते. यावरून मॅक्सटर्नने एल्विशची खिल्ली उडवली होती. मॅक्सटर्नने ‘एक्स’वर एल्विश व मुनव्वरचे अनेक व्हिडीओ, फोटो पोस्ट करून ‘बिग बॉस ओटीटी २’च्या विजेत्या विरोधात बोलत होता. यामुळेच एल्विश भडकला. एवढंच नाही तर काही नेटकऱ्यांनी एल्विशवर अशी टीका केली की, तो स्वतःला रामभक्त, सनातनी म्हणतो आणि हिंदू धर्माचा अपमान करणाऱ्या मुनव्वरबरोबर फिरतो. हाच वाद आता शिगेला पोहोचला आहे. याच वादावरून एल्विशने मॅक्सटर्नला बेदम मारहाण केली आहे. यामुळे आता एल्विश पुन्हा एकदा अडचणीत सापडण्याची दाट शक्यता आहे.
