युट्यूबर व ‘बिग बॉस ओटीटी २’ चा विजेता एल्विश यादवच्या अडचणी कमी होताना दिसत नाहीयेत. रेव्ह पार्टी आयोजित करणं व त्या पार्टीत सापांचे विष पुरवणं या आरोपाखाली एल्विश यादवला अटक झाली होती. पाच दिवस तुरुंगात राहिल्यानंतर त्याला जामीन मंजूर झाला होता, पण आता पोलिसांनी एल्विश व इतर सात जणांविरोधात १२०० पानांचं आरोपपत्र नोएडांनी पोलिसांनी सूरजपूर कोर्टात दाखल केलं आहे. याप्रकरणी पोलिसांनी २४ साक्षीदारांचे जबाब नोंदवले आहेत.
एल्विश यादव गारुड्यांच्या संपर्क होता, असं या आरोपपत्रात म्हटलं आहे. तसेच पोलिसांनी काही पुरावेही गोळा केले आहेत. एल्विश केवळ गारुड्यांच्या संपर्कात नव्हता तर तो विष पुरवठा आणि खरेदीमध्येही सामील होता. पोलिसांनी याप्रकरणातील व्हिडीओ, कॉलचे डिटेल्स व इतर पुराव्यांच्या आधारे आरोपपत्र तयार केलं आहे. यासोबतच एल्विशवर लावण्यात आलेल्या एनडीपीएस कलमांनाही आधार बनवण्यात आले आहे. याप्रकरणी पोलीस फॉरेन्सिक मेडिसिन टॉक्सिकोलॉजी तज्ज्ञांचा सल्लाही घेत आहेत.
गेल्या वर्षी नोव्हेंबरमध्ये पीएफए अधिकाऱ्याने एल्विशवर सापाचे विष पुरवल्याचा आरोप केला होता. नोएडाच्या सेक्टर ४९ मध्ये एल्विशवर गुन्हा दाखल करण्यात आला होता. काही महिन्यांनंतर, १७ मार्च रोजी एल्विशला अटक करण्यात आली आणि त्याला १४ दिवसांची न्यायालयीन कोठडी सुनावण्यात आली, पाच दिवस तुरुंगात राहिल्यानंतर त्याला जामीन मिळाला.
तुरुंगातून बाहेर आल्यानंतर एल्विशने व्हिडीओ बनवून आपण असा कोणताही गुन्हा केला नव्हता, असं सांगितलं होतं. आपल्याला फसवलं जात आहे, असंही त्याने म्हटलं होतं. याप्रकरणी आता पोलिसांनी १२०० पानांचं आरोपपत्र दाखल केलं असून पुढे एल्विशवर काय कारवाई होईल, ते पाहणं महत्त्वाचं ठरेल.
