प्लॅनेट मराठी या ओटीटी विश्वातील पहिलं मराठी प्लॅटफॉर्म आजपासून एक नवीन वेबसीरिज प्रेक्षकांच्या भेटीला आली आहे. प्लॅनेट मराठीवरच्या ‘रानबाजार’, ‘अनुराधा’ यांसारख्या वेब सीरिजनंतर ‘बेबी ऑन बोर्ड’ (Baby on board) या वेबसीरिजचे दोन भाग प्रदर्शित झाले आहेत. ‘बेबी ऑन बोर्ड’च्या ट्रेलरनंतर प्रेक्षकांची या सीरिजविषयीची उत्सुकता अधिकच वाढली. प्रेक्षकांच्या या उत्सुकतेला पूर्णविराम देत ‘बेबी ऑन बोर्ड’ चे २ एपिसोड्स प्लॅनेट मराठी ओटीटीवर प्रदर्शित झाले आहेत.
‘बेबी ऑन बोर्ड’च्या पहिल्या दोन एपिसोड्समध्ये प्रतीक्षा मुणगेकर म्हणजेच श्रुती व अभिजीत आमकार म्हणजेच सिद्धार्थचा त्यांच्या नव्या घरात गृहप्रवेश पाहायला मिळत आहे. गृहप्रवेश करतानाचा या जोडप्याचा आनंद, उत्सुकता यात दिसतोय. श्रुतीचे बाळंतपण सिद्धार्थने करायचे ठरवल्यावर आता एक बाबा आणि नवरा म्हणून त्याची जबाबदारी तो कशी पार पाडतो, या दरम्यान या दोघांमध्ये होणारी नोकझोक यात अधिकच रंगत आणत असल्याचे पाहायला मिळत आहे.
आणखी वाचा : बाळाच्या आईची काळजी घेताना बाबाची होणार दमछाक, ‘बेबी ऑन बोर्ड’ वेब सीरिजचा धमाकेदार ट्रेलर पाहिलात का?
श्रुतीचे डोहाळे पुरवण्यापासून तिच्या प्रेग्नंन्सी डाएटपासून खाण्या – पिण्याच्या वेळेची काळजी सिद्धार्थ घेत आहे. स्वतः चमचमीत, चाविष्ट पदार्थांचा त्याग करणारा, श्रुतीला मॉर्निंग वॉकला घेऊन जाणारा एक उत्तम नवरा आणि ‘डॅड टू बी’ सिद्धार्थ सर्वांनाच आवडताना दिसत आहे. या पहिल्या दोन एपिसोड्सने प्रेक्षकांचे भरभरून मनोरंजन केल्याचे पाहायला मिळत आहे. त्यानंतर आता या सिरीजमध्ये पुढे काय घडणार याची उत्सुकता सर्वांनाच लागून राहिली आहे.
आणखी वाचा : “आता फक्त धुराळा…” प्रवीण तरडेंचा व्यायाम करतानाचा व्हिडीओ पाहिलात का?
प्लॅनेट मराठी ओरिजनल्स, फिल्मी आऊल स्टुडिओज प्रस्तुत ‘बेबी ऑन बोर्ड’ या सीरिजचे दिग्दर्शन सागर केसरकर यांनी केले आहे. तर याचे निर्माते साईनाथ राजाध्यक्ष व बिना राजाध्यक्ष हे आहेत. त्याबरोबर अंकित शिंदे व दिव्या घाग हे कार्यकारी निर्माते आहेत.
