सचिन पिळगांवकर निर्मित, दिग्दर्शित ‘नवरा माझा नवसाचा २’ चित्रपटासाठी प्रेक्षकांमध्ये खूप उत्सुकता पाहायला मिळाली. या चित्रपटाची घोषणा होताच सोशल मीडियावर ‘नवरा माझा नवसाचा’ चित्रपटातील मजेशीर डायलॉग, गाणी व्हायरल झाली होती. १९ वर्षांनंतर ‘नवरा माझा नवसाचा २’ चित्रपट २० सप्टेंबरला प्रदर्शित झाला आणि प्रेक्षकांनी उदंड प्रतिसाद दिला.
‘नवरा माझा नवसाचा २’ चित्रपटाने प्रदर्शनानंतर पहिल्याच आठवड्यात बक्कळ कमाई केली. या चित्रपटाने पहिल्याच दिवशी १.८६ कोटींची कमाई केली. त्यानंतर दुसऱ्या दिवशी २.४३ कोटी आणि तिसऱ्या दिवशी ३.५५ कोटींचा गल्ला ‘नवरा माझा नवसाचा २’ने जमवला. मग या चित्रपटाची बॉक्स ऑफिसवर जबरदस्त घौडदोड पाहायला मिळाली.
हेही वाचा – “प्रिय आजोबा…”, मराठी सिनेसृष्टीतील प्रसिद्ध खलनायक राजशेखर यांच्या नातवाने लिहिलं भावुक पत्र, म्हणाला…
एका वेगळ्या नवसाची गोष्ट प्रेक्षकांच्या चांगलीच पसंतीस उतरली. ‘नवरा माझा नवसाचा २’ या चित्रपटात ज्येष्ठ अभिनेते अशोक सराफ, सचिन पिळगांवकर, सुप्रिया पिळगांवकर, स्वप्नील जोशी, हेमल इंगळे, अलीसागर, विजय पाटकर, निर्मिती सावंत, निवेदिता सराफ, वैभव मांगले, सिद्धार्थ जाधव, संतोष पवार, जयवंत वाडकर अशी दिग्गज कलाकारांची फौज पाहायला मिळाली. या चित्रपटाला प्रदर्शित होऊन ५० दिवस पूर्ण झाले आहेत. अजूनही चित्रपट बॉक्स ऑफिसवर कमाई करत आहे.
काही दिवसांपूर्वी ब्लॉकबस्टर ‘नवरा माझा नवसाचा २’ चित्रपटाची सक्सेस पार्टी जोरदार पार पडली. या सक्सेस पार्टीमध्ये चित्रपटातील कलाकार मंडळींसह इतर कलाकारांनी खास उपस्थिती लावली होती. याचे फोटो, व्हिडीओ चित्रपटातील कलाकारांनी सोशल मीडियावर शेअर केले होते. ५० दिवसांनंतर आता ‘नवरा माझा नवसाचा २’ चित्रपट ओटीटीवर प्रदर्शित झाला आहे. यासंदर्भात सचिन पिळगांवकर यांनी नुकतीच पोस्ट केली आहे. “आता ‘नवरा माझा नवसाचा २’ चित्रपट ‘अमेझॉन प्राईम’वर प्रदर्शित झाला असून चित्रपटगृहात देखील सुरू आहे”, असं सचिन पिळगांवकरांनी त्यांच्या पोस्टमधून सांगितलं आहे.
हेही वाचा – Video:…म्हणून अंकिता वालावलकरने सूरज चव्हाणची घेतली उशीरा भेट, म्हणाली, “पॅडी दादा…”
माहितीनुसार, ‘नवरा माझा नवसाचा २’ चित्रपटाचं बजेट ८ कोटींच्या आसपास होतं. हे बजेट चित्रपटाने फक्त चार दिवसांत वसूल केलं आहे. या चित्रपटाची नवसाची गोष्ट कोकण रेल्वे प्रवासात घडली आहे.
