‘होणार सून मी ह्या घरची’ या मालिकेमुळे अभिनेता शशांक केतकर घराघरांत लोकप्रिय झाला. या मालिकेत त्याने साकारलेली श्रीरंग गोडबोले ही व्यक्तिरेखा प्रेक्षकांच्या आजही लक्षात आहे. छोट्या पडद्यावर यश मिळाल्यानंतर शशांक चित्रपटांकडे वळला. आजवर त्याने नाटक, मालिका, चित्रपट, वेब सीरिज अशा चारही माध्यमांमध्ये आपल्या अभिनयाचा ठसा उमटवला आहे.
शशांकने काही दिवसांपूर्वी प्रदर्शित झालेल्या ‘स्कॅम २००३’ या तेलगी घोटाळ्यावर आधारित सीरिजमध्ये महत्त्वाची भूमिका साकारली होती. या सीरिजमध्ये शशांकने साकारलेल्या भूमिकेचं सर्वत्र कौतुक करण्यात आलं. अशातच आता अभिनेत्याने त्याच्या चाहत्यांना आणखी एक आनंदाची बातमी दिली आहे.
शशांक लवकरच धर्मा प्रोडक्शन अर्थात करण जोहरची निर्मिती असलेल्या आगामी सीरिजमध्ये महत्त्वाची भूमिका साकारणार आहे. या सीरिजचं नाव ‘शो टाइम’ असून, ही बहुचर्चित सीरिज येत्या ८ मार्चला प्रदर्शित केली जाणार आहे. याविषयी अभिनेता लिहितो, “८ मार्चपासून हॉटस्टारवर ‘शो टाइम’ पाहायला विसरू नका. जेव्हा मी धर्मा प्रोडक्शनच्या ऑफिसमध्ये मीटिंगसाठी गेलो तेव्हाच जाणवलं ‘कुछ कुछ होता है’ माझी भूमिका लहानशी आहे पण, प्रेक्षकांसाठी ही भूमिका नक्कीच लक्षवेधी ठरेल.”
दरम्यान, ‘शो टाइम’ सीरिजमध्ये मौनी रॉय, श्रिया सरन, इमरान हाश्मी, नसीरुद्दीन शाह, महिमा मकवाना, राजीव खंडेलवाल यांसारखे दिग्गज कलाकार एकत्र झळकणार आहेत. अशा लोकप्रिय कलाकारांबरोबर मराठी अभिनेता स्क्रीन शेअर करणार असल्याने सध्या शशांकवर मराठी कलाविश्वातून शुभेच्छांचा वर्षाव करण्यात येत आहे.
