मराठी आणि हिंदी चित्रपट, वेब सिरीज अशा विविध माध्यमातून काम करून स्वतःला सिद्ध करणारी अभिनेत्री म्हणजे श्रिया पिळगावकर. यावर्षी ती ‘गिल्टी माइंड्स’ आणि ‘द ब्रोकन न्यूज’ या वेब सिरीजमध्ये झळकली. तिच्या या दोन्ही वेब सिरीज तुफान हिट झाल्या. त्यानंतर आता ती ‘ताजा खबर’ या वेब सिरीजच्या माध्यमातून प्रेक्षकांच्या भेटीला येणार आहे. या वेब सिरीजमध्ये ती एका देहविक्री करणाऱ्या महिलेच्या भूमिकेत दिसणार आहे. ही भूमिका साकारण्याचा तिचा अनुभव कसा होता हे तिने नुकतंच सांगितलं.
‘ताजा खबर’ या वेब सिरीजचा ट्रेलर नुकताच प्रदर्शित झाला. या ट्रेलरमध्ये श्रियाचीही झलक दिसली. देहविक्री करणाऱ्या महिलेच्या भूमिकेत तिला बघताच तिच्या चाहत्यांना आश्चर्याचा धक्का बसला. तिचा हा अंदाजही सर्वांना आवडला असून प्रेक्षक त्याबद्दल तिचं कौतुक करत आहेत.
याबाबत एका वृत्तवाहिनीला दिलेल्या मुलाखतीत श्रिया म्हणाली, “‘ताजा खबर’ या वेब सिरीजचा भाग बनून मी खूप खुश आहे. यापूर्वी मी अशी कोणतीही भूमिका साकारली नव्हती. पण या सिरीजच्या निमित्ताने मला माझ्या अभिनय कौशल्याची ही बाजूही आजमावता आली. त्यामुळे माझ्यासाठी हा अनुभव खूपच नवीन होता.”
हेही वाचा : OTT वरील लोकप्रिय नाव बनलं आहे ‘श्रिया पिळगावकर’
पुढे तिने सांगितलं, ” याआधी ‘गिल्टी माईंड्स’मध्ये वकील म्हणून आणि ‘द ब्रोकन न्यूज’मध्ये पत्रकार म्हणून प्रेक्षकांनी मला पाहिलं. आता ‘ताजा खबर’ या सिरीजमध्ये प्रेक्षकांना मी आणखीनच वेगळ्या भूमिकेत दिसणार आहे. मी स्वतः या सिरीजसाठी खूप उत्सुक आहे. कारण ही अत्यंत वेगळी भूमिका आहे.” ही सिरीज ६ जानेवारी रोजी ‘डिस्ने प्लस हॉटस्टार’वर प्रदर्शित होईल.
