सिनेमाचे पटकथा लेखक, गीतकार जावेद अख्तर हे लखनऊ या ठिकाणी पोहचले. शायर मुनव्वर राणा यांच्या कुटुंबाचं त्यांनी सांत्वन केलं. तसंच शायर मुनव्वर राणा यांच्या पार्थिवाला त्यांनी खांदाही दिला. यावेळी जावेद अख्तर चांगलेच भावूक झालेले पाहण्यास मिळाले. भारतीय शायरीचं खूप मोठं नुकसान झालं आहे अशा शब्दांत त्यांनी आपल्या भावनांना वाट करुन दिली.
काय म्हणाले जावेद अख्तर?
सोमवारीच प्रसिद्ध शायर आणि कवी मुनव्वर राणा यांच्या निधनाचं वृत्त आलं. रविवारी रात्री उशिरा त्यांची प्राणज्योत मालवली. सोमवारी त्यांच्या पार्थिवावर अंत्यसंस्कार करण्यात आले. त्यावेळी जावेद अख्तर हे या ठिकाणी पोहचले होते. त्यांनी मीडियाशी संवाद साधत असताना मुनव्वर राणा यांच्या निधनानंतर शोक व्यक्त केला. भारतातल्या शायरीचं आणि कवितेचं खूप मोठं नुकसान मुनव्वर राणा यांच्या निधनामुळे झाल्याचं त्यांनी म्हटलं आहे.
हे पण वाचा- प्रसिद्ध शायर मुनव्वर राणा यांचं निधन, बंडखोर कवी काळाच्या पडद्याआड
जावेद अख्तर पुढे म्हणाले, “राहत इंदौरी, निदा फाजली आणि आता मुनव्वर राणा यांच्यासारख्या शायरांनी जगाचा निरोप घेतल्याने शायरीतली अदब हळूहळू लोप पावते आहे असं वाटू लागलं आहे. त्यांच्या निधनामुळे आपलं कधीही भरुन न येणारं नुकसान झालं आहे.” असंही मत जावेद अख्तर यांनी व्यक्त केलं. त्याचप्रमाणे जावेद अख्तर यांनी मुनव्वर राणा यांच्या कुटुंबाची भेट घेऊन आपल्या भावना व्यक्त केल्या.
हे पण वाचा- Javed Akhtar on Animal Movie: “जर हे चित्रपट हिट होत असतील…”, गीतकार जावेद अख्तर यांचे वक्तव्य
मुनव्वर राणा यांची गजल आई या गहन विषयावर आधारीत होती. त्यांच्याआधी कुणीही आई या विषयावर गझल लिहिली नव्हती. मात्र आई हा त्यांच्या गझलचा अविभाज्य भाग होऊन गेली. त्यांची शायरी आपल्या कायमच स्मरणात राहिल असंही जावेद अख्तर यावेळी म्हणाले.
