दिग्दर्शक मणिरत्नम यांचा ‘पोन्नियिन सेल्वन: २’ हा चित्रपट २८ एप्रिल रोजी जगभरात प्रदर्शित झाला. चित्रपट बॉक्स ऑफिसवर चांगली कमाई करीत आहे. अवघ्या दोन दिवसांत १०० कोटींचा टप्पा गाठणाऱ्या या चित्रपटाची कमाई मात्र सहाव्या दिवशी मंदावली आहे. सुरुवातीच्या चार दिवसांत चित्रपटाने १५० कोटी कमावले होते. मात्र, आता चित्रपटाच्या कमाईत घट होताना दिसत आहे.
हेही वाचा- स्विमिंग पूलमध्ये सारा अली खानसह दिसणारा ‘मिस्ट्री मॅन’ कोण? व्हायरल फोटोनंतर चर्चांना उधाण
‘पोन्नियिन सेल्वन : २’ संपूर्ण भारतात तमिळ, तेलगू, मल्याळम्, कन्नड आणि हिंदी या पाच भाषांमध्ये प्रदर्शित झाला. दमदार ओपनिंग करणाऱ्या ‘PS-2’ च्या कलेक्शनमध्ये गेल्या तीन दिवसांपासून मोठी घसरण झाली आहे. मंगळवारपासून म्हणजेच रिलीजच्या पाचव्या दिवसापासून चित्रपटाची कमाई कमी होऊ लागली. ‘PS-2’ ने मंगळवारी १०.५ कोटींची कमाई केली. त्यानंतर बुधवारी म्हणजेच सहाव्या दिवशी चित्रपटाने ७.७५ कोटींची कमाई केली. दरम्यान, चित्रपटाच्या सातव्या दिवशी म्हणजेच गुरुवारी सुरुवातीचे आकडेही आले आहेत. त्यानुसार ‘PS-2’च्या कलेक्शनमध्ये मोठी घसरण झाली आहे.
सकनिल्‍कच्‍या रिपोर्टनुसार, ‘PS-2’ ने सातव्या दिवशी अवघ्या ६.५० कोटींचा बिझनेस केला आहे. यासह, चित्रपटाचे एकूण कलेक्शन आता १२८.५० कोटी रुपयांवर पोहोचले आहे.
‘पोन्नियिन सेल्वन: २’ हा कल्की कृष्णमूर्ती यांनी लिहिलेल्या याच नावाच्या लोकप्रिय साहित्यिक कादंबरीवरून रूपांतरित केलेला पीरियड ड्रामा चित्रपट आहे. चित्रपटाच्या पहिल्या भागाने जगभरातील बॉक्स ऑफिसवर ५०० कोटींहून अधिक कमाई केली होती. या चित्रपटात चियान विक्रम, ऐश्वर्या राय बच्चन, कार्ती, त्रिशा आणि जयम रवी यांच्या प्रमुख भूमिका आहेत. तर ऐश्वर्या लक्ष्मी, शोभिता धुलिपाला, जयराम, प्रकाश राज, विक्रम प्रभू, सरथकुमार, पार्थिवन आणि प्रभू साहाय्यक भूमिकेत आहेत.
