दाक्षिणात्य अभिनेता प्रभास त्याच्या नुकत्याच प्रदर्शित झालेल्या ‘आदिपुरुष’ चित्रपटामुळे चांगलाच चर्चेत आहे. चित्रपटातील संवादांपासून ते कलाकारांच्या लुकपर्यंत सोशल मीडियावर ‘आदिपुरुष’मुळे अनेक वाद निर्माण झाले. आदिपुरुष पाठोपाठ आता प्रभासच्या दोन चित्रपटांची जबरदस्त चर्चा होत आहे. एक म्हणजे ‘सलार’ आणि दूसरा चित्रपट म्हणजे बहुचर्चित ‘प्रोजेक्ट के’.
‘प्रोजेक्ट के’ चित्रपटात प्रभासबरोबर दीपिका पदूकोण, अमिताभ बच्चन कमल हासन असे दिग्गज कलाकार दिसणार आहेत. नुकतंच यातील दीपिका पदूकोणचा लूक व्हायरल झाला अन् त्या पाठोपाठ या चित्रपटातील प्रभासचा फर्स्ट लूकही प्रदर्शित झाला. आता या ‘प्रोजेक्ट के’च्या प्रभासच्या नव्या पोस्टरवरही प्रेक्षकांनी टीका केली आहे.
आणखी वाचा : “असे चित्रपट फ्लॉप होणं…” चित्रपट समीक्षक तरण आदर्श यांची ‘आदिपुरुष’वर जोरदार टीका
या नव्या पोस्टरमध्ये प्रभास हा एका भक्कम अशा पोलादी पोषाख करून एकदम अॅक्शन मोडमध्ये दिसत आहे. या पोस्टरमध्ये प्रभासचा पोशाख आणि एकंदर त्याचा अवतार पाहता लोकांनी हे पोस्टर मार्वल कॉमिकच्या ‘आयर्न मॅन’च्या पोस्टरवरुन चोरल्याचा आरोप केला आहे. ‘आयर्न मॅन’ आणि ‘प्रोजेक्ट के’च्या या पोस्टरमधील साम्य लोकांनी दाखवून दिलं आहे.
काही नेटकऱ्यांनी तर हा प्रभासचा चेहेरा वाटतच नसल्याचंही कॉमेंट करत लिहिलं आहे. बऱ्याच लोकांनी पोस्टरच्या एडिटिंगवर बोट ठेवलं आहे. एकूणच सोशल मीडियावर ‘प्रोजेक्ट के’च्या या नव्या पोस्टरला प्रेक्षक चांगलंच ट्रोल करत आहेत. चित्रपटाचे दिग्दर्शक नाग अश्विन चित्रपटासाठी प्रचंड मेहनत घेत असून ‘प्रोजेक्ट के’मध्ये चांगले ग्राफिक्स वापरण्यात येणार आहेत. ‘प्रोजेक्ट के’चे जवळपास ७० टक्केहून अधिक शूटिंग पूर्ण झाले आहे. या चित्रपटाचे बजेट खूप जास्त असून हा एक सायन्स फिक्शन चित्रपट असेल.
