Pushpa 2 Allu Arjun Arrest Video: तेलुगू सुपरस्टार अल्लू अर्जुनला हैदराबादमधून पोलिसांनी अटक केली आहे. हैदराबादमध्ये ४ डिसेंबर रोजी ‘पुष्पा’ चित्रपटाच्या प्रीमियरमध्ये चेंगराचेंगरी झाली होती. या घटनेत एका महिलेचा मृत्यू झाला होता. या प्रकरणी पोलीस तक्रार दाखल करण्यात आली होती. त्यानंतर आज पोलिसांनी अभिनेत्याला अटक केली. त्याच्या अटकेआधीचा व्हिडीओ समोर आला आहे.
अल्लू अर्जुनला पोलिसांनी अटक केली, त्याआधी तो त्याची पत्नी स्नेहाशी बोलताना दिसतोय. यावेळी स्नेहा काळजीत असल्याचं दिसत आहे. अल्लू व स्नेहाच्या भोवती बरीच गर्दी दिसत आहे. यावेळी अल्लू पत्नीच्या गालावर किस करतो आणि नाश्ता करतो आणि नंतर पोलिसांबरोबर बाहेर पडतो. पुढे अल्लू अर्जुन हसत हसत पोलिसांबरोबर जाऊन गाडीत बसतो, असं या व्हिडीओत पाहायला मिळत आहे. अल्लूला अटक झाली, त्यावेळी त्याने घातलेल्या हूडीने लक्ष वेधले आहे. ‘फ्लॉवर नहीं, फायर है मैं’ असं त्याच्या हूडीवर लिहिलं आहे.
अल्लू अर्जुनच्या अटकेचा व्हिडीओ पल्लव पालिवालच्या अकाउंटवरून शेअर करण्यात आला आहे. या व्हिडीओवर नेटकरी विविध प्रकारच्या प्रतिक्रिया देत आहेत. महिलेचा मृत्यू झाला, यात अल्लू अर्जुनची काहीही चूक नाही, ही थिएटर मालकाची चूक आहे, त्यामुळे त्यांना अटक व्हायला हवी, असं काहींनी म्हटलं आहे. तर काहींनी अल्लू अर्जुनला अटक होणं हा पब्लिसिटी स्टंट असल्याच्या कमेंट्स केल्या आहेत.
नेमकं प्रकरण काय?
४ डिसेंबरला ‘पुष्पा २’ चित्रपटाचा प्रिमियर इव्हेंट होता. याठिकाणी झालेल्या चेंगराचेंगरीच्या दुर्घटनेमध्ये एका ३९ वर्षीय महिलेचा मृत्यू झाला होता. या महिलेचा मुलगा रुग्णालयात असून त्याची प्रकृती गंभीर आहे. याप्रकरणी पोलिसांनी अभिनेता अल्लू अर्जुन, संध्या थिएटर व्यवस्थापन आणि अल्लू अर्जुनच्या सुरक्षा पथकाविरोधात गुन्हा दाखल केला होता. पोलिसांनी अल्लू अर्जुनला शुक्रवारी दुपारी अटक करून चिक्कडपल्ली पोलीस स्थानकात नेलं आहे. महिलेच्या मृत्यूची नोंद याच पोलीस स्टेशनमध्ये करण्यात आली आहे.
© IE Online Media Services (P) Ltd