Pushpa 2 Worldwide Box Office Collection Day 26: तीन वर्षांपूर्वी आलेल्या पुष्पा: द राइजचा ॲक्शन-पॅक सिक्वेल पुष्पा 2: द रुल ५ डिसेंबर रोजी जगभरात प्रदर्शित झाला. अल्लू अर्जुन, रश्मिका मंदाना व फहाद फासिल यांच्या मुख्य भूमिका असलेला हा चित्रपट बॉक्स ऑफिस गाजवत आहे. चौथ्या आठवड्यातही सिनेमाचा बॉक्स ऑफिसवर जलवा आहे. चौथ्या सोमवारी (डिसेंबर ३०) कलेक्शनमध्ये आधीच्या तुलनेत मोठी घट झाली आहे. सॅकनिल्कने दिलेल्या वृत्तानुसार, २६ व्या दिवशी चित्रपटाने एकूण ६.६५ कोटी रुपयांचे कलेक्शन केले. ही त्याची आजपर्यंतची सर्वात कमी कमाई आहे. या चित्रपटाचे सर्व भाषांमधील देशभरातील एकूण कलेक्शन ११६३.६५ कोटी रुपये झाले आहे.
पुष्पा 2 ने देशभरात जबरदस्त कामगिरी केली आहे. या चित्रपटाने तेलुगू भाषेत नवीन विक्रम रचला आहे. पण हिंदीने मूळ तेलुगू भाषेपेक्षा जास्त कमाई केली. २६ दिवसांत या चित्रपटाने तेलुगू भाषेत ३२६.३१ कोटी रुपयांची कमाई केली आहे, तर त्याच्या हिंदीत तब्बल ७५८.६५ कोटी रुपयांची कमाई केली आहे.
पुष्पा 2 जगभरातील कमाई किती?
तेलुगू आणि हिंदीशिवाय पुष्पा 2 ने इतर भाषांमध्ये देखील चांगली कामगिरी केली आहे. चित्रपटाने तामिळमध्ये ५६.९५ कोटी रुपये, मल्याळममध्ये १४.१२ कोटी रुपये आणि कन्नडमध्ये ७.६२ कोटी रुपये कमावले आहेत. या आकडेवारीवरून प्रादेशिक चित्रपटांची इतर राज्यांमध्ये वाढत असलेली लोकप्रियता दिसून येत आहे. मैथ्री मूव्ही मेकर्सची निर्मिती असलेल्या या चित्रपटाने जगभरात १७६० कोटी रुपयांची कमाई केली आहे. या चित्रपटाने डिसेंबरमध्ये प्रदर्शित झालेल्या ‘वनवास’, ‘बेबी जॉन’, ‘मुफासा: द लायन किंग’सह इतर चित्रपटांना मागे टाकलं.
पुष्पा 2: द रुल हा २०२४ मधील सर्वाधिक कमाई करणाऱ्या चित्रपटांपैकी एक आहे. चित्रपटाने कमाईचे अनेक विक्रम मोडले आहे. या चित्रपटाच्या प्रिमियरमध्ये झालेल्या चेंगराचेंगरीत एका महिलेचा मृत्यू झाल्याने अल्लु अर्जून वादात अडकला. याप्रकरणी त्याला अटकही करण्यात आली होती. मृत महिलेचा नऊ वर्षांचा मुलगा गंभीर जखमी असून रुग्णालयात दाखल आहे. त्याचा खर्च अल्लू अर्जुनचे कुटुंबीय व चित्रपटाच्या निर्मात्यांनी उचलला आहे.
