रजनीकांत यांचा ‘जेलर’ चित्रपट गुरुवारी प्रदर्शित झाला. या चित्रपटाला पहिल्याच दिवशी थिएटरमध्ये दमदार ओपनिंग मिळाली. चित्रपटाने पहिल्याच दिवशी ५० कोटींची कमाई करत एक नवा रेकॉर्ड बनवला. रजनीकांत यांच्या या चित्रपटाची प्रेक्षक आतुरतेने वाट बघत होते. कर्नाटक, केरळ आणि आंध्र प्रदेशात ‘जेलर’ हा पहिल्याच दिवशी सर्वाधिक कमाई करणारा चित्रपट ठरला आहे. पहिल्याच दिवशी रजनीकांत यांच्या चित्रपटाने तब्बल ५ विक्रम मोडीत काढले आहेत.
चित्रपट प्रदर्शित होण्याआधी मात्र रजनीकांत यांनी हिमालयात प्रस्थान केलं. कोविडमुळे त्यांच्या या आध्यात्मिक प्रवासात खंड पडला होता, पण आता नुकतंच ‘जेलर’च्या प्रदर्शनाआधीच रजनीकांत हिमालयात गेल्याचं समोर आलं. आता नुकताच रजनीकांत यांचा एक नवा व्हिडीओ समोर आला आहे. या व्हिडीओमध्ये रजनीकांत आपल्या आध्यात्मिक प्रवासाविषयी आणि ‘जेलर’च्या यशाबद्दल बोलताना दिसत आहेत.
आणखी वाचा : ‘जलसा’मधील ‘ही’ आहे अमिताभ बच्चन यांची आवडती जागा; ब्लॉगच्या माध्यमातून खुद्द बिग बींनी केला खुलासा
रजनीकांत यांनी आध्यात्मिक गरू दयानंद स्वामी यांच्या ऋषिकेश येथील आश्रमात हजेरी लावली यावेळी रजनीकांत यांनी त्यांच्या गुरूचा महिमा आणि एकूणच त्यांचा आध्यात्मिक अनुभव यावार भाष्य केलं. रजनीकांत म्हणाले, “जेलरकडून लोकांना खूप अपेक्षा आहेत. मी जेव्हा दयानंद स्वामी यांच्या आश्रमात आलो आणि त्यांचे आशीर्वाद घेतले तेव्हा माझ्या डोक्यात सतत ‘जेलर’चा विचार सुरू होता. त्यावेळी स्वामीजी म्हणाले की काळजी नसावी चित्रपट यशस्वी होणार. स्वामीजी म्हणाले चित्रपट हिट होणार याहून आणखी काय हवं?”
नेल्सन दिग्दर्शित ‘जेलर’ सध्या बॉक्स ऑफिसवर धुमाकूळ घालत आहे. चार दिवसांतच या चित्रपटाने ३०० कोटींची कमाई केली आहे. लवकरच हा चित्रपट ४०० कोटींच्या क्लबमध्ये एंट्री घेईल असंही म्हंटलं जात आहे. यामध्ये रजनीकांत जेलर ‘टायगर’ मुथुवेल पांडियनच्या भूमिकेत आहेत. या चित्रपटात राम्या कृष्णन, तमन्ना भाटिया, विनायकन, योगी बाबू यांच्याही भूमिका आहेत. मोहनलाल आणि जॅकी श्रॉफ यांच्या छोट्या पण महत्त्वाच्या भूमिकादेखील आहेत.
