लाल रंगाचा स्वेटर आणि मफलर घातलेला आणि गंगा (मंदाकिनी) चा आवाज ऐकून थक्क झालेला ‘राम तेरी गंगा मैली’ चित्रपटातील अभिनेता तुम्हाला आठवत असेल. तिच्या हातातून पडणारा कलश पडतो. तो तिला पकडण्यासाठी धावतो आणि तेव्हाच तो तिला पहिल्यांदा भेटतो. गोरी त्वचा आणि कुरळे केस असलेला हा अभिनेता होता राजीव कपूर. राज कपूर यांचा धाकटा मुलगा. रणधीर कपूर आणि ऋषी कपूर यांचा भाऊ. कपूर घराण्यातील असा मुलगा, जो कधीच सुपरस्टार होऊ शकला नाही. राज कपूर यांनी मरेपर्यंत आपल्या मुलाचं नशीब बदलण्याचा खूप प्रयत्न केला, पण त्यात ते अयशस्वी ठरले. चित्रपट असो की वैयक्तिक आयुष्य, प्रत्येक ठिकाणी राजीव कपूर अपयशी ठरले.
राज कपूर बॉलिवूडचा शोमन म्हणून ओळखल्या जाणाऱ्या राज कपूर यांचा धाकटा मुलगा राजीव कपूर यांचा आज जन्मदिवस २५ ऑगस्ट १९६२ रोजी जन्मलेले राजीव फक्त एक अभिनेताच नाही तर निर्माता आणि दिग्दर्शकही होते. त्यांचा ‘राम तेरी गंगा मैली’ (१९८५) बराच गाजला होता. राजीवने १९८३ मध्ये ‘एक जान है हम’ या चित्रपटातून अभिनय क्षेत्रात पदार्पण केलं होतं. त्यावेळी ते अवघे २१ वर्षांचे होते. बरोबर २ वर्षांनंतर त्यांचा ‘राम तेरी गंगा मैली’ चित्रपट प्रेक्षकांच्या भेटीला आला. राज कपूर यांच्या दिग्दर्शनाखाली बनलेला हा शेवटचा चित्रपट होता.
राजीव यांनी १९८४ मध्ये ‘आस्कमन’, १९८५ मध्ये ‘लवर बॉय’ आणि ‘जबरदस्त’, १९८८ मध्ये ‘हम तो चले परदेस’ यांसारख्या चित्रपटांमध्ये काम केले, मात्र सर्व चित्रपट फ्लॉप ठरले. १९९० मध्ये त्यांनी दिलीप कुमार आणि रेखा यांच्यासह ‘आग का दरिया’ या चित्रपटात काम केले होते, पण तो प्रदर्शित झाला नाही. त्याच वर्षी त्यांचा ‘रिस्पॉन्सिबल’ प्रदर्शित झाला आणि त्यानंतर त्यांनी अभिनय सोडून निर्मिती आणि दिग्दर्शनाच्या जगात पाऊल ठेवले.
आणखी वाचा- ‘राम तेरी गंगा मैली’मधील ‘त्या’ वादग्रस्त सीनवर ३७ वर्षांनंतर मंदाकिनी यांनी सोडलं मौन, म्हणाल्या…
१९८८ मध्ये राज कपूर यांचं निधन झालं. त्यानंतर राजीव कपूर १९९१ मध्ये ‘मेहंदी’ चित्रपटाचे निर्माते झाले. त्यांचा मोठा भाऊ रणधीर कपूर यांनी हा चित्रपट दिग्दर्शित केला होता. यानंतर बरोबर ५ वर्षांनी १९९६ मध्ये त्यांनी दिग्दर्शनात पदार्पण केलं पण इथेही त्यांना यश मिळाले नाही. या चित्रपटाचे नाव ‘प्रेम ग्रंथ’ होतं, ज्यामध्ये ऋषी कपूर आणि माधुरी दीक्षित मुख्य भूमिकेत होते. हा चित्रपट फ्लॉप ठरला. यानंतर राजीव यांनी चित्रपटांपासून दूर राहण्यास सुरुवात केली. १९९९ मध्ये, त्यांनी ‘आ अब लौट चलें’ चित्रपटाची निर्मिती केली, ज्याचे दिग्दर्शन त्यांचे भाऊ ऋषी कपूर यांनी केले होते.
राजीव यांचं व्यावसायिक जीवन अयशस्वी ठरलं, तसंच त्यांचं वैयक्तिक आयुष्यही फारसं चांगलं नव्हतं. राजीव यांनी२००१ मध्ये आर्किटेक्ट आरती सभरवाल यांच्याशी लग्न झाले होते, परंतु त्यांचे लग्न २ वर्षेही टिकू शकले नाही. २००३ मध्ये त्यांचा घटस्फोट झाला. लग्नापूर्वी राजीव यांचे नाव अनेक अभिनेत्रींसोबत जोडले गेले होते. अभिनेत्री दिव्या राणा, अभिनेत्री तृष्णा हिच्यासोबत त्यांचे अफेअर होते असे म्हटले जाते. प्रसिद्ध अभिनेत्री नगमासोबतही त्यांचे नाव जोडले गेले. ‘प्रेम रोग’च्या शूटिंगदरम्यान ते पद्मिनीला डेट करत असल्याचं बोललं जायचं. याशिवाय त्यांचे नाव ‘बॉर्डर’ फेम सपना बेदीसोबतही जोडले गेले होते. मात्र, लग्नानंतरही ते एकटे राहिले. घटस्फोटानंतर त्यांनी दुसरे लग्नही केले नाही.
९ फेब्रुवारी २०२१ रोजी सकाळी जेव्हा राजीव कपूर यांना हृदयविकाराचा झटका आला तेव्हा ते त्यांचा भाऊ रणधीर यांच्या घरी होते. कुटुंबीयांनी त्यांना तातडीने रुग्णालयात नेले, मात्र डॉक्टरांनी त्यांना मृत घोषित केले. त्यांचे वय ५८ वर्षे होते.
