सुप्रसिद्ध रॅपर रफ्तार सिंगची प्रत्येक गाणी आजवर सुपरहिट ठरली आहेत. तरुणाईला वेड लावणारा रफ्तार आता त्याच्या खासगी आयुष्यामुळे चर्चेत आला आहे. रफ्तार पत्नी कोमल वोहरापासून लवकरच विभक्त होणार आहे. त्याच्या या निर्णयामुळे सगळ्यांनाच आश्चर्याचा धक्का बसला आहे. गेल्या काही वर्षांपासून रफ्तार आणि कोमल वेगवेगळे राहत आहेत. आता अधिकृतरित्या घटस्फोट घेण्याचा दोघांनीही निर्णय घेतला आहे.
२०१६मध्ये रफ्तारने कोमलशी लग्नगाठ बांधली. अगदी थाटामाटात रफ्तार-कोमलचा विवाहसोहळा पार पडला. लग्नाच्या अवघ्या सहा वर्षांमध्येच रफ्तार आणि कोमल एकमेकांच्या सहमतीने विभक्त होत आहेत. २०२०मध्येच या दोघांनी घटस्फोटासाठी अर्ज केला होता. मात्र करोना काळामध्ये ही सगळी प्रक्रिया लांबणीवर गेली. पण रफ्तार याची लव्हस्टोरी अगदी फिल्मी स्टाइल होती.
रफ्तारचा प्रेमविवाह होता. २०११पासून रफ्तार कोमलला डेट करत होता. कोमलला पाहताक्षणीच रफ्तार तिच्या प्रेमात पडला. लग्नापूर्वी काही काळ एकमेकांना डेट केल्यानंतर त्यांनी लग्न करण्याचा निर्णय घेतला. पण लग्नाच्या काही वर्षांतच रफ्तार-कोमलमध्ये मतभेद होण्यास सुरुवात झाली.
हिंदुस्तान टाइम्सच्या वृत्तानुसार, रफ्तार-कोमलच्या जवळच्या व्यक्तीने सांगितलं की, दोघंही आपापल्या आयुष्यामध्ये पुढे गेले आहेत. ६ ऑक्टोबर २०२२मध्ये दोघं अधिकृतरित्या एकमेकांपासून विभक्त होतील. लग्नाच्या काही महिन्यांनंतरच दोघांमध्ये वाद होण्यास सुरुवात झाली होती. मात्र एकमेकांच्या कुटुंबाविषयी दोघांनाही विशेष प्रेम आहे. रफ्तार आणि कोमलने इन्स्टाग्रामवर अकाऊंटवरुन एकमेकांना अनफॉलो केलं आहे.
