‘टार्झन: द वंडर कार’ या चित्रटातील ‘त्या’ सुपरकारची अवस्था पाहिलीत?

२००४ मध्ये प्रदर्शित झालेल्या या चित्रपटातून प्रेक्षकांच्या भेटीला आलेली ती कार खऱ्या अर्थाने एका नव्या ट्रेंडसाठी कारणीभूत ठरली. कित्येकांनी तर या कारसाठीच चित्रपट पाहण्याचा हट्ट केला होता. ‘मलाही अशीच कार हवी’, असा हट्ट धरणारे बरेचजण आज वयाने मोठे झाले असले तरीही त्यांच्या मनात या ‘वंडर कार’चे स्थान मात्र कायम आहे असे म्हणणे वावगे ठरणार नाही. एकेकाळी प्रेक्षकांच्या आणि सुपर कारच्या प्रेमात असणाऱ्यांच्या मनाचा ठाव घेणाऱ्या त्या कारची आता मात्र दुरावस्था झाली असून, एका गॅरेजमध्ये ती धूळ खात पडली आहे.

एका प्रसिद्ध वृत्तपत्राच्या माहितीनुसार जवळपास १३ वर्षांपूर्वीची ही कार एका गॅरेजमध्ये दुर्लक्षित अवस्थेत पडली आहे. विक्रम आदित्यशुक्ला आपल्या कॉलेजला जात असताना गॅरेजमध्ये असलेल्या या ‘वंडर कार’वर त्याची नजर पडली. त्यानंतर त्याने कारचे काही फोटोही काढले. त्याने काढलेले हे फोटो सध्या सोशल मीडियावरही चर्चेत आल्याचे कळते.

वाचा : व्हायरल होणाऱ्या सुंदर महिला पोलीस अधिकाऱ्याच्या…

वत्सल सेठ आणि आएशा टाकिया यांच्या महत्त्वाच्या भूमिका असणाऱ्या ‘टार्झन: द वंडर कार’ या चित्रपटातील कारची अवस्था अगदी वाईट असून, त्याकडे कोणाचेही लक्ष जात नाहीये. लक्ष गेले तरीही ही ‘टार्झन’ कार असल्याचे लक्षात येत नाहीये, कारण, कारच्या बऱ्याच भागाचा रंग गेला असून, काही भागावर गंजही चढला आहे. शिवय बऱ्याच प्रमाणात कारचे नुकसानही झाले आहे. सहसा चित्रपटांमध्ये वापरलेल्या काही अनोख्या वस्तू संग्रही ठेवल्या जातात. पण, ‘टार्झन’च्या बाबतीत मात्र तसे काहीच झाल्याचे दिसत नाहीये हीच खंत सध्या व्यक्त केली जातेय.