बॉलीवूडचा दबंग अभिनेता सलमान खानचा पुढील वर्षी २४ जानेवारीला प्रदर्शित होणा-या चित्रपटाचे शीर्षक ‘जय हो’ असे असण्याची शक्यता आहे.
यास दुजोरा देत चित्रपटाचा दिग्दर्शक सोहेल खान म्हणाला की, हो, चित्रपटाचे शीर्षक ‘जय हो’ असे ठरवण्यात आले आहे. मेंटल हे शीर्षक केवळ औपचारिकता म्हणून ठेवलेले नाव होते. तसेच, हे नवे शीर्षक त्याच्या वडिलांना म्हणजेच सलीम खान यांनाही आवडले असल्याचे त्याने सांगितले.
चित्रपटाचे ‘मेंटल’ हे शीर्षक सलमानने ठेवले होते. परंतु, प्रदर्शनाची तारीख २४ जानेवारी ठरवल्यामुळे सलीम खान यांना हे शीर्षक खटकले. तेव्हा २६ जानेवारीच्या अनुषंगाने चित्रपटाचे नाव देशभक्तीला साजेसे असावे, असे त्यांना वाटले. त्यामुळे चित्रपटाचे नाव ‘मेंटल’ बदलून ‘जय हो’ असे ठेवण्यात आले. भ्रष्टाचार निर्मूलनाचा संदेश देण्यात येणा-या या चित्रपटात सलमानने एका सामाजिक योद्धयाची भूमिका केली आहे.