Video : दाक्षिणात्य चाहत्यांसाठी मराठमोळ्या सावनी रविंद्रची ‘रोमँण्टीक’ भेट

सावनीने मराठीप्रमाणेच दाक्षिणात्य चित्रपटामध्येही आपला सुरेल आवाज दिला आहे. ‘ईमाई’, ‘कुटाल’ हे तिचे गाजलेले दाक्षिणात्य चित्रपट असून ‘वेनिलाविन सलाईगल्ली’ ‘कत्रिल इधगळ’,’उईरे उईरे’ यामध्ये देखील सावनीने तिचा स्वरसाज चढविली आहे. मात्र सावनीने तामिळ भाषेत एखादं रोमँण्टीक गाणं म्हणावं अशी तिच्या दाक्षिणात्य चाहत्यांची इच्छा होती. या इच्छेखातर सावनीने ‘सावनी ओरिजनल्स’ या तिच्या सीरिजमध्ये ‘नाना सोल्लव्वा’ हे दाक्षिणात्य रोमँण्टीक गाणं म्हटलं आहे. नाना सोल्लव्वा या तमिळ शब्दांचा अर्थ ‘तूला एक सांगू का’ असा आहे.

सतिशकांतने लिहिलेल्या या रोमँण्टिक गीताला शुभंकर शेंबेकरने संगीत दिले आहे. आणि सावनी रविंद्रसोबत गायलेही आहे. ‘सावनी ओरिजनल्स’ सीरिजमधील हे पहिलेच गाणे आहे.

‘दक्षिणेकडे माझे बरेच चाहते असून मी त्यांच्यासाठी तामिळ भाषेत एखादं रोमँण्टीक गाणं सादर करावं अशी त्यांची इच्छा होती. या इच्छेखातर मी हे गाणं गायलं आहे. मुख्य म्हणजे या गाण्याचे संगीत नियोजन चैन्नईमधल्या म्युझिशियननी केल्याने गाणं खूप अस्सल तमिळ मातीतलं वाटतंय. चित्रीकरणही गाण्याला साजेसेच करण्यात आलंय. तमिळ आणि मराठी कानसेनांच्या गाण्यांविषयीच्या आवडींमध्ये साम्य असतं असं मला वाटतं. त्यामुळे हे सुमधूर गीत मराठी रसिकांनाही आवडेल असा मला विश्वास आहे’, असं सावनी म्हणाली.