“आता देवच त्यांच्यावर बहिष्कार टाकतोय…”; शाहरुखवर संतापला एकेकाळचा सहकलाकार

अभिनेता पुनीत वशिष्ठ मंगळवारी अंमली पदार्थविरोधी पथकाच्या मुंबई ऑफिसबाहेर काही कामानिमित्त गेला होता. यावेळी प्रसारमाध्यमांनी त्याला आर्यन खानच्या अटकेबद्दल काही प्रश्न विचारले. त्यावेळी पुनीतने फार रागारागात संतापत त्याला प्रश्नांची उत्तर दिली. यावेळी पुनीत म्हणाला, “मी या सर्व प्रकरणात सहभागी नाही. गेल्या २७ वर्षापूर्वी सिनेसृष्टीतील खानांनी माझ्यावर बहिष्कार टाकला आणि आता देव त्यांच्यावर बहिष्कार टाकत आहे.”

बॉम्बे टाईम्सने त्यांच्या इन्स्टाग्रामवर याबाबतचा एक व्हिडीओ पोस्ट केला आहे. या व्हिडीओत पुनित प्रचंड रागात असल्याचे दिसत आहे. “मी ‘जोश’, ‘क्या कहना’ यासारख्या सर्व चित्रपटात काम केलंय. पण मी या सर्व गोष्टीत कधीही सहभागी झालो नाही. त्यामुळे खान-पान यांनी २७ वर्षे मला सिनेसृष्टीतून बहिष्कृत केले. आता मात्र देव त्यांच्यावर बहिष्कार टाकत आहे.” असे पुनीत म्हणाला.

यापूर्वीही पुनीत वशिष्ठने शाहरुख खानवर अनेकदा निशाणा साधला आहे. पुनीत वशिष्ठने जुलै २०२१ मध्ये शाहरुख खानला अपात्र ठरवले होते. पुनीत वशिष्ठने शाहरुख खान, सलमान खान यांची तुलना विद्युत जामवालशी केली होती. विद्युत जामवालसमोर ‘सलमान खान, शाहरुख खान, रणवीर सिंह … काय आहेत’ असे पुनीतने म्हटले.