धर्मा प्रोडक्शनच्या ‘या’ चित्रपटातून शाहिद कपूर आऊट!

‘बॉलिवूड हंगामा’नुसार, ‘जर्सी’ चित्रपटासोबतच शाहिद ‘योद्धा’ या चित्रपटात झळकणार असल्याचं म्हटलं जात होतं. मात्र, आता शाहिद या चित्रपटाचा भाग नसणार आहे. शाहिदने स्वत: हा चित्रपट करण्यास नकार दिल्याचं सांगण्यात येत आहे. ‘योद्धा’ या चित्रपटाची निर्मिती धर्मा प्रोडक्शन अंतर्गत करण्यात येत असून त्याचं दिग्दर्शन शशांक खेतान करत आहेत.

‘जर्सी’चं चित्रीकरण पूर्ण झाल्यानंतर शाहिद ‘योद्धा’च्या चित्रीकरणास सुरुवात करणार होता.परंतु, या चित्रपटातील काही भाग न पटल्यामुळे त्याने हा चित्रपट करण्यास नकार दिला आहे.

‘योद्धा’मधील काही भाग शाहिदला पटले नव्हते त्यामुळे ते काढून टाकावे किंवा त्यात बदल करावा असं शाहिदचं मत होतं. मात्र, त्याचं हे मत चित्रपट निर्मात्यांना मान्य नव्हतं. त्यामुळे शाहिदने या चित्रपटातून काढता पाय घेतला आहे. दरम्यान, ‘कबीर सिंह’ या चित्रपटाच्या यशानंतर शाहिदने त्याच्या मानधनात वाढ केली आहे. त्यासोबतच सध्या तो भूमिकेपेक्षा चित्रपटांच्या कथेवर जास्त लक्ष केंद्रित करत आहेत.