सोनाक्षी सिन्हा तिच्या आगामी ‘हॉलीडे’ आणि ‘अॅक्शन जॅक्सन’ चित्रपटांच्या चित्रीकरणात व्यस्त होती. आणि आता ही दबंग अभिनेत्री अर्जुन कपूरसोबत ‘तेवर’ हा चित्रपट करण्यात व्यस्त झाली आहे. सोनाक्षीने ट्विटवर फोटो ट्विट केला असून, त्यासोबत “इनके तेवर तो देखो! दिगदर्शक, निर्माता, अभिनेता #सेटवर” असे लिहले आहे. फोटोमध्ये चित्रपटातील मुख्य कलाकार, दिग्दर्शक अमित शर्मा, निर्माता आणि अर्जुनचा काका संजय कपूर दिसत आहेत.
२०१३ हे सोनाक्षीसाठी संमिश्र वर्ष ठरले. ‘लुटेरा’ आणि ‘आर…राजकुमार’ या तिच्या चित्रपटांनी चांगली कामगिरी केली, तर ‘बुलेट राजा’ हा चित्रपट सपशेल पडला. असे असले तरी २०१४ साठी तिने कंबर कसली आहे. याबाबत तिने काही दिवसांपूर्वीच ट्विट केले होते की, नवा दिवस… नवा चित्रपट! आज, गुंडा अर्जुनबरोबर काम करायला सुरूवात केली. जयपूरकडे प्रयाण! मला शुभेच्छा द्या 🙂
अर्जुन कपूरचे वडील बॉनी कपूर या चित्रपटाची निर्मिती करीत असून, अमित शर्मा या चित्रपटाद्वारे दिग्दर्शनाच्या क्षेत्रात पदार्पण करत आहे. ‘तेवर’ हा चित्रपट ‘ओक्कडू’ या तेलगू चित्रपटाचा रिमेक आहे. मिळालेल्या माहिती नुसार, या चित्रपटात अर्जुन कपूर आग्रास्थित कब्बडीपटूची भूमिका साकारत आहे.
सोनाक्षी सिन्हाकडे प्रभू देवाचा ‘अॅक्शन जॅक्सन’ हा अजय देवगणसोबतचा आणि अक्षय कुमारबरोबर ‘हॉलिडे’ हे चित्रपटदेखील आहेत.
