चित्रपट दिग्दर्शक राजकुमार हिरानी यांचे आतापर्यंत प्रत्येक चित्रपट सुपरहिट ठरले आहेत. या सुपरहिट ठरलेल्या चित्रपटांच्या यादीमध्ये २००३ साली प्रदर्शित झालेला ‘मुन्नाभाई एमबीबीएस’ या चित्रपटाचं नाव आवर्जुन घेतलं जातं. संजय दत्तची प्रमुख भूमिका असलेला हा चित्रपट आजही प्रत्येक प्रेक्षकाला खळखळून हसवतो. त्यामुळे पुन्हा एकदा प्रेक्षकांना खळखळून हसविण्यासाठी या चित्रपटाचा ३ भागही लवकरच प्रेक्षकांच्या भेटीला येणार आहे. सध्या या चित्रपटामध्ये अभिनेत्री सोनम कपूर झळकणार असल्याची चर्चा रंगली आहे. मात्र या चित्रपटात काम करण्यासाठी सोनमने एक अट ठेवल्याचं पाहायला मिळत आहे.
सोनमचा ‘एक लड़की को देखा तो ऐसा लगा’ हा चित्रपट १ फेब्रुवारी रोजी प्रेक्षकांच्या भेटीला आला. या चित्रपटात सोनमने केलेल्या उत्तम अभिनयामुळे तिला ‘मुन्नाभाई ३’ साठी विचारणा करण्यात आल्याचं सांगण्यात येत आहे. मात्र सोनमे हे वृत्त फेटाळून लावत मला चित्रपटासाठी कोणतीही ऑफर आली नाही. जर यापुढे कधी चित्रपटासाठी ऑफर आली तर एका अटीवरच मी हा चित्रपट करेन, असं सोनमने एका मुलाखतीत म्हटलं आहे.
‘मला ‘मुन्नाभाई’च्या सीरिजमध्ये काम करायला नक्कीच आवडेल. पण यासाठी माझी एक अट आहे. जर या चित्रपटाचं नाव ‘मुन्नी बहन’ असेल तरच मी काम करेन, असं सोनमने म्हटल्याचं ‘टाईम्स नाऊ’च्या वृत्तामध्ये नमूद केलं आहे.
दरम्यान, सोनमच्या करिअरचा आलेख सध्या उंचावत आहे. ‘सावरिया’ चित्रपटातून बॉलिवूडमध्ये पदार्पण करणाऱ्या सोनमने संजू चित्रपटातही काम केलं होतं. या चित्रपटातील तिचं काम पाहता तिच्याकडे चित्रपटांच्या ऑफर्स येऊ लागल्या आहेत. ‘एक लडकी को देखा तो ऐसा लगा’ या चित्रपटामध्ये ती मुख्य भूमिकेत असून तिच्यासोबत अभिनेता अनिल कपूर झळकले आहेत. विशेष म्हणजे या चित्रपटाच्या माध्यमातून पहिल्यांदाच या बाप-लेकीने एकत्र स्क्रीन शेअर केली आहे.
