शनिवारी अमली पथक विरोधी पथकाने मुंबईत मोठी कारवाई करत क्रूझ शिपवर सुरु असलेल्या रेव्ह पार्टीवर छापा टाकला आहे. या प्रकरणात आतापर्यंत ८ जणांना अटक करण्यात आली आहे. ज्यामध्ये बॉलिवूड स्टार शाहरुख खानचा मुलगा आर्यन खानचा समावेश आहे. एनसीबीने आर्यन खानसह आठ जणांना ड्रग पार्टीच्या संदर्भात ताब्यात घेतले होते. दरम्यान, अभिनेता सुनिल शेट्टीने या संपूर्ण प्रकरणावर आपली प्रतिक्रिया दिली आहे.
एएनआय वृत्तसंस्थेने ट्विटरवर एक व्हिडिओ शेअर केला आहे. या व्हिडिओमध्ये अभिनेता सुनील शेट्टीने नुकत्याच झालेल्या नार्कोटिक्स कंट्रोल ब्युरोच्या कारवाईवर प्रतिक्रिया दिली. ज्यामध्ये शाहरुख खानचा मुलगा आर्यनलाही ताब्यात घेण्यात आले आहे. या व्हिडीओमध्ये सुनील खरे रिपोर्ट बाहेर येऊ द्या असे म्हणताना दिसत आहे.
“जेव्हा एखाद्या जागी धाड टाकण्यात येते, तेव्हा तिथे बरेच लोक असतात. म्हणून आम्ही असे गृहीत धरतो की या मुलाने ड्रग्स घेतले, या मुलाने हे केले. मला वाटते की प्रक्रिया चालू आहे, म्हणून ती तशीच ठेवा आणि त्या मुलाला श्वास घेण्यास वेळ द्या. जेव्हा आमच्या उद्योगात काहीही घडते, तेव्हा माध्यम लगेचच तुटून पडतात,” असे सुनील शेट्टी म्हणाला.
“प्रत्येकाला वाटते की हा देखील असाच असेल. त्या मुलाला एक संधी द्या आणि खरा अहवाल बाहेर येण्यासाठी वेळ द्या. अजून लहान आहे. तोपर्यंत त्यांची काळजी घेण्याची जबाबदारी आपली आहे.” सुनीलच्या या व्हिडिओवर सोशल मीडिया वापरकर्त्यांच्या संमिश्र प्रतिक्रिया येत आहेत.
एनसीबीने मुंबईजवळील कॉर्डेलिया द इम्प्रेस या क्रूझवर छापा टाकला, त्या पार्टीमध्ये सुमारे ६०० लोक उपस्थित होते. माध्यमांच्या वृत्तानुसार, शाहरुख खानचा मुलगा आर्यनसह ८ लोकांना ताब्यात घेण्यात आले आहे, ज्यात ३ मुलींचा समावेश आहे. आरसीन खान, अरबाज मर्चंट, मुनमुन धामेचा, नुपूर सारिका, इस्मीत सिंग, मोहक जसवाल, विक्रांत छोकर आणि गोमित चोप्रा यांची एनसीबी चौकशी करत आहे.