“मी भत्ता घेणार नाही, एक लाडू घेतला तरी…”, सिद्धिविनायक मंदिराच्या वादावर आदेश बांदेकरांनी मांडलं स्पष्ट मत, म्हणाले…

आदेश बांदेकर म्हणाले, “आपण अध्यात्म खूप मानतो… मी मागे घेतलेल्या पत्रकार परिषदेमध्ये सुद्धा एकच गोष्ट सांगितली होती ती म्हणजे, आयुष्यात अनेक गोष्टी होत असतात पण, शेवटी सिद्धिविनायकाला मला उत्तर द्यायचं आहे. मी साडेसहा वर्षे मंदिरात अध्यक्ष होतो आणि माझ्या नावाचं एकही व्हाउचर मंदिरात नाहीये. एक लाडू जरी घेतला तरी मी त्याचे पैसे दिलेले आहेत. याबद्दल सगळा रेकॉर्ड आहे.”

हेही वाचा : Video : आशा भोसलेंच्या ४० वर्षे जुन्या गाण्यावर माधुरी दीक्षितच्या मनमोहक अदा, मराठी अभिनेत्रींनी केल्या खास कमेंट्स

बांदेकर पुढे म्हणाले, “सिद्धिविनायक मंदिराच्या न्यास समितीमध्ये काम करताना मला राज्यमंत्रीपदाचा दर्जा देण्यात आला होता. ज्या दिवशी मला हा दर्जा मिळाला, त्या दिवसानंतर बरोबर एक महिन्यांनी मी विधीन्याय विभागाला पत्र दिलेलं आहे की, मी कुठलाही भत्ता घेणार नाही आणि मी नाही घेतला. बऱ्याच वेळेला अशा मोठ्या देवस्थानांसाठी काम करायला मिळणं ही आपल्या आई-वडिलांची पुण्याई असते.”

हेही वाचा : पडद्यावर कोणाची भूमिका करायला आवडेल? शरद पवार यांचं नाव घेत प्रसाद ओक म्हणाला, “ते महाराष्ट्रातील…”

“मंदिरात जे भाविक दानपेटीत पैसे देतात…त्यांच्या एक-एक रुपयाचं मोल खूप मोठं असतं. त्यामुळे या काळात मला सिद्धिविनायकाची सेवा करायला मिळाली ही खूप मोठी गोष्ट आहे. मला आनंद कधी व्हायचा ज्यावेळी मी वैद्यकीय मदतीचा चेक सही करून द्यायचो. गरजू माऊली येऊन तो चेक जेव्हा डोक्याला लावायची. तेव्हा मन भरून यायचं. ज्याठिकाणी एक-एक रुपयाचं एवढं मोठं मोल आहे तिथे चुकीचा विचार मनात येणं केवळ अशक्य आहे. त्या देवाला मला उत्तर द्यायचंय म्हणून मी उत्तमप्रकारे काम करून त्याची सेवा केली. निष्ठेने काम केलं म्हणून आजही आनंदाने प्रवास सुरूये अजून काय पाहिजे.” असं आदेश बांदेकर यांनी सांगितलं.