Aai Kuthe Kay Karte Fame Kaumudi Walokar : मराठी कलाविश्वातील बहुतांश कलाकारांचा विवाहसोहळा गेल्या काही दिवसांत थाटामाटात पार पडल्याचं पाहायला मिळालं. शाल्व-श्रेया, किरण गायकवाड, निखिल राजेशिर्के, रेश्मा शिंदे असे मनोरंजन विश्वातील अनेक कलाकार लग्नबंधनात अडकले. आता यामध्ये आणखी एका अभिनेत्रीचं नाव जोडलं जाणार आहे. ‘आई कुठे काय करते’ मालिकेतील अभिनेत्रीच्या घरी सध्या लगीनघाई सुरू झाल्याचं पाहायला मिळत आहे.
‘आई कुठे काय करते’ मालिकेने तब्बल पाच वर्षांनी प्रेक्षकांचा निरोप घेतला. या मालिकेतील प्रत्येक पात्राला घराघरांत पसंती मिळाली. अरुंधती, यश, अभिषेक, अनघा, अप्पा, अनिरुद्ध, आरोही या सगळ्या पात्रांचा घराघरांत एक वेगळा चाहतावर्ग निर्माण झाला होता. यापैकी आरोहीची भूमिका साकारणाऱ्या अभिनेत्री कौमुदी वलोकरने मालिका संपल्यावर खऱ्या आयुष्यात एका नव्या प्रवासाला सुरुवात केली आहे. दोन दिवसांपूर्वीच कौमुदीचं ग्रहमख पार पडलं होतं. आता तिच्या हातावर मेहंदी सजली आहे.
कौमुदीच्या ( Kaumudi Walokar ) घरात आता लग्नाआधीच्या विधींना सुरुवात झाली असून तिचे जवळचे मित्रमंडळी अभिनेत्रीच्या लग्नाची आतुरतेने वाट पाहत आहेत. कौमुदीच्या मेहंदी सोहळ्याला आता सुरुवात झाली असून, याची लहानशी झलक अभिनेत्रीने इन्स्टाग्रामवर शेअर केली आहे. कौमुदीच्या होणाऱ्या नवऱ्याचं नाव आकाश चौकसे असं आहे. तो कलाविश्वापासून दूर आहे.
‘आई कुठे काय करते’ मालिकेतील कलाकारांनी काही दिवसांपूर्वीच कौमुदीचं केळवण केलं होतं. तिच्या ( Kaumudi Walokar ) केळवणासाठी खास फुलांची आणि केळीच्या पानांची सजावट करण्यात आली होती. यशची भूमिका साकारणारा अभिषेक देशमुख तसेच त्याची पत्नी कृतिका देव. अनिशची भूमिका साकारणारा अभिनेता सुमंत ठाकरे आणि अश्विनी महांगडे यांनी अभिनेत्रीच्या केळवणासाठी खास व्यवस्था केली होती.
दरम्यान, आता लवकरच विवाहबंधनात अडकून कौमुदी ( Kaumudi Walokar ) एका नव्या आयुष्याची सुरुवात करणार आहे. अभिनेत्रीच्या लग्नाला कलाविश्वातील तिचे जवळचे मित्रमंडळी उपस्थित राहणार आहेत.
