‘स्टार प्रवाह’ वाहिनीवरील लोकप्रिय मालिका ‘आई कुठे काय करते’ नेहमीच चर्चेचा विषय असते. या मालिकेतील प्रत्येक पात्र घराघरात पोहोचले आहे. २०१९ला अखेरीस सुरू झालेली ही मालिका अजूनही प्रेक्षकांच्या मनावर अधिराज्य गाजवत आहे. ‘आई कुठे काय करते’ मालिकेतील अरुंधती हे पात्र विशेष लोकप्रिय ठरले आहे. अरुंधती म्हणजेच अभिनेत्री मधुराणी प्रभुलकरने आपल्या अभिनयाने प्रेक्षकांच्या मनात एक वेगळेच स्थान निर्माण केले आहे. अभिनयाबरोबर तिच्या कविताही आता चांगल्याच चर्चेत असतात. अलीकडेच झालेल्या एका मुलाखतीमध्ये मधुराणीने तिच्यामधल्या आणखी एका कौशल्याचा खुलासा केला आहे. या अभिनेत्रीने एका चित्रपटातील गाणी संगीतबद्ध केल्याचे सांगितले आहे.
‘इसापतीनी एंटरटेन्मेंट’ या युट्यूब चॅनेलवरील छापा काटा या कार्यक्रमात मधुराणी प्रभुलकर सहभागी झाली होती. त्या वेळेस तिला ‘चित्रपटांसाठी लिखाण, कविता किंवा गाणी लिहितेस का’, असा प्रश्न विचारण्यात आला होता. तेव्हा मधुराणी म्हणाली, “मी मुळात संगीतकार आहे. गाणी संगीतबद्ध करते. सुंदर माझं घर नावाचा जो चित्रपट होता; ज्याचं प्रमोदनं (पती) दिग्दर्शन केलं होतं. त्या चित्रपटातील गाण्यांना मी संगीत दिलं होतं. त्यासाठी गुरू ठाकूरनं काही गीतं लिहिली होती; तर श्रेया घोशाल, साधना सरगम, आरती अंकलीकर यांनी त्या चित्रपटातील गाणी गायली होती. मी चित्रपटातील गाण्यांना संगीत देते, याबाबत फार कोणाला माहीत नाही.”
हेही वाचा – Bigg Boss मध्ये सुरू झालेली आणखी एक लव्हस्टोरी संपली; ‘या’ जोडीचा झाला ब्रेकअप
हेही वाचा – Video: उत्साहाच्या भरात अल्लू अर्जुनकडून झाली चूक? ‘पुष्पा-२’चा डायलॉग झाला लीक
मधुराणीच्या या उत्तरावर मुलाखतदार म्हणतो, “अजय-अतुलनं हे बघितलं तर त्यांना फार टेन्शन येईल.” त्यावर मधुराणी म्हणते, “मी गाण्यांना चाली देते हे अजय-अतुल यांना माहीत आहे. अवधूत गुप्ते, सलील कुलकर्णी या सगळ्यांना याबाबत माहीत आहे; पण त्यांना हेही माहीत आहे की, ही एक अभिनेत्री आहे. ती अभिनयच करेल. त्यामुळे त्यांना टेन्शन नाही.”
हेही वाचा – अभिनेत्री मौनी रॉय ९ दिवसांनंतर हॉस्पिटलमधून परतली; म्हणाली, “प्रकृती…”
दरम्यान, काही दिवसांपासून मधुराणी पतीपासून विभक्त होणार असल्याचा चर्चांना उधाण आले होते. पण तिचा पती म्हणजे प्रमोद प्रभुलकरने या चर्चांना पूर्णविराम दिला. “आमच्यात घटस्फोट घेण्यासारखं काहीही घडलेलं नसून आम्ही एकत्रच राहत आहोत” , असे स्पष्टीकरण प्रमोद प्रभुलकरने दिले.
