‘आई कुठे काय करते’ ही छोट्या पडद्यावरील लोकप्रिय मालिका आहे. अल्पावधीतच या मालिकेने प्रेक्षकांची पसंती मिळवली. या मालिकेतील कलाकारांचा अभिनय आणि याचबरोबर या मालिकेची कथा प्रेक्षकांना खूप आवडली. पण गेल्या काही महिन्यांमध्ये या मालिकेत अनेक ट्विस्ट आणि टर्न येत आहेत. अशातच या मालिकेचा आता एक नवीन प्रोमो समोर आला आहे.
काही महिन्यांपूर्वी या मालिकेमध्ये आशुतोष आणि अरुंधती यांचा लग्न सोहळा संपन्न झाला. लग्नानंतरही त्यांच्या संसारात अनेक चढ-उतार येताना दिसत आहेत. तर आता आशुतोषने अरुंधतीकडे त्याला बाबा व्हायचं असल्याची इच्छा व्यक्त केली आहे.
वाहिनीने या मालिकेचा नवीन प्रोमो नुकताच सोशल मीडियावर पोस्ट केला. यात आशुतोष अरुंधतीला म्हणतो, “मला बाबा व्हायचं आहे अरुंधती. आपण मूल दत्तक घेतलं तर?” त्यावर अरुंधती त्याला म्हणते, “ते शक्य नाहीये. पुन्हा एक नवीन जीव आपल्या आयुष्यात येणार. आपण त्याला मोठं करायचं…या सगळ्याला खूप बळ लागतं. मला नाही वाटत आता माझ्याकडे ते उरलं आहे.”
हा प्रोमो सोशल मीडियावर येताच चांगलाच चर्चेत आला आहे. हा प्रोमो पाहून नेटकरी हैराण झालेले दिसत आहेत. या व्हिडिओवर कमेंट करत आता प्रेक्षक या प्रोमोबद्दल नापासंती व्यक्त करताना दिसत आहेत.
