‘इंडियन आयडल’च्या पहिल्या पर्वाचा विजेता अभिजीत सावंत सध्या ‘बिग बॉस मराठी’चं पाचवं पर्व गाजवतं आहे. या पर्वात अभिजीत सावंतने खेळाडू वृत्तीने, त्याच्या स्वभावाने प्रेक्षकांची मनं जिंकली आहेत. त्यामुळेच नेहमी नॉमिनेशमध्ये असणाऱ्या अभिजीतला प्रेक्षक भरभरून व्हॉट करून ‘बिग बॉस’मधून बाहेर जाण्यापासून वाचवताना दिसत आहेत. अशातच अभिजीत सावंतने दिवंगत बाळासाहेब ठाकरेंच्या भेटीचा सांगितलेला किस्सा चांगलाच चर्चेत आला आहे. या भेटीत नेमकं काय घडलं? वाचा…
अभिजीत सावंतने ‘लोकमत फिल्मी’ला दिलेल्या मुलाखतीमध्ये बाळासाहेब ठाकरेंच्या भेटीचा किस्सा सांगितला. यावेळी अभिजीतला विचारलं की, ‘इंडियन आयडल’चा विजेता म्हणून जेव्हा तुझं नाव जाहीर झालं होतं तेव्हा ही अफवा आली होती की, ‘सोनी टीव्ही’वर शिवसेनेने दबाव आणला आणि त्यामुळे अभिजीत सावंतचं नाव विजेता म्हणून घोषित केलं. हे तू ऐकलं आहेस का? तुला त्याबद्दल आता काय म्हणायचं आहे? यावर अभिजीत म्हणाला, “मला नाही वाटतं, असं काही झालं असेल. पण मी विजेता झाल्यानंतर मातोश्रीवर गेलेलो. बाळासाहेब ठाकरेंनी मला घरी बोलावलेलं. त्यांना कलाकारांची खूप आवड आहे ना. त्यामुळे त्यांच्या घरातल्या वरच्या मजल्यावर आम्ही सगळे बसलो. त्यांनी मला उद्देश दिले. काय केलं पाहिजे, काय नाही केलं पाहिजे, याविषयी बोललो.”
“तसंच त्यांनी पूर्ण कुटुंबाला बोलावलं होतं. संपूर्ण ठाकरे कुटुंब माझ्यासमोर उभं होतं. बाळासाहेबांमी माझी कुटुंबातील सदस्यांबरोबर ओळख करून दिली. माझ्याबरोबर आई-वडील होते. आम्ही ज्यांना मतदान करायचो, ज्यांना आम्ही तारणहार समजायचो, महाराष्ट्राचं चांगलं हेच करणार, असं म्हणायचो. तेच आपले आवडते नेते ते आम्हाला ओळख करून देतायत. हा बघा, हा हे आहे, अशी नाव घेऊन ते ओळख करून देत होते. तो एक वेगळाच अनुभव होता,” असं अभिजीत म्हणाला.
हेही वाचा – Video : आदित्य आणि पारू देणार प्रीतमच्या प्रेमाला साथ पण…; नेमकं काय घडणार? पाहा नवा प्रोमो
अभिजीतने उद्धव ठाकरेंचा सांगितलेला मजेशीर किस्सा वाचा…
पुढे अभिजीतने उद्धव ठाकरेंचा मजेशीर किस्सा सांगितला. तो म्हणाला, “माननीय उद्धव ठाकरेंनी मला त्यांचा अनुभव सांगितला. ते म्हणाले, “आम्ही ना काय करायचो. आमची मिटिंग वगैरे चालू असायची आणि मिटिंगमध्ये आमची चर्चा असायची. तेव्हा मी तुझ्यासाठी खिशातला हळूच मोबाइल काढून तुला मत करायला जायचो.”
“पण असं काही नव्हतं की त्यांनी वाहिनीवर दबाव आणला. तसं मग सगळ्यांनीच दबाब टाकला असता. राहूलसाठी तर जास्त दबाव टाकायला पाहिजे होता. तो पण मराठीचं आहे. त्यात त्याच्याकडे आधी स्टार व्हॅल्यूव क्वॉलिटी होती,” असं स्पष्ट अभिजीत सावंत म्हणाला.
