‘रंग माझा वेगळा’ मालिकेतून घराघरात पोहोचलेला आदित्य म्हणजेच अभिनेता अंबर गणपुळे सध्या चांगलाच चर्चेत आहे. कारण आहे त्याची नवी मालिका. ‘कलर्स मराठी’ वाहिनीवर नुकतीच अंबर गणपुळेची ‘दुर्गा’ ही मालिका नवी सुरू झाली आहे. या मालिकेतील अभिनेता प्रमुख भूमिकेत झळकला आहे. त्यामुळे अंबर सध्या विविध एंटरटेनमेंट युट्यूब चॅनलशी संवाद साधताना दिसत आहे. अशातच त्याने होणारी बायको अभिनेत्री शिवानी सोनार आयुष्यात आल्यामुळे कसा मोठा बदल झाला? याविषयी सांगितलं. नेमकं तो काय म्हणाला? वाचा…
‘दुर्गा’ मालिकेनिमित्ताने अभिनेता अंबर गणपुळेने नुकताच ‘राजश्री मराठी’ एंटरटेनमेंट युट्यूब चॅनलशी संवाद साधला. यावेळी त्याला विचारलं की, साखरपुडा झाल्यानंतर तुला मालिका मिळाली आहे. त्यात तू प्रमुख भूमिका करत आहे. तर हे लेडी लक म्हणायचं का? यावर अंबर म्हणाला, “हो, १०० टक्के लेडी लक आहे. शिवानी आल्यापासून माझ्या आयुष्यात गोष्टी बदलल्या आहेत. सकारात्मक दृष्टीकोनातून बदल झाला आहे. एक माणूस म्हणून हळूहळू बदल होत आहे.”
पुढे अंबर गणपुळे म्हणाला, “मी पूर्ण स्वतःच्या कोषात असायचो. आता तिने मला यातून बाहेर काढलं आहे. आमच्या स्वभावात खूप विरोधाभास आहे. पण ती वेळोवेळी मला पुश करत असते तू हे कर तू ते कर वगैरे. मी तसा प्रयत्नही करतो. त्यामुळे माझ्याबरोबर लेडी लक आहेच.”
वेळेअभावी सध्या तारेवरची कसरत आहे – अंबर गणपुळे
“आता आम्ही दोघं मुंबईत राहून ही आमचं लाँग डिस्टन्स सुरू आहे. त्यामुळे ती गोरेगावला, मी ठाण्याला असतो. चित्रीकरणाच्या वेळा मॅच होतं नाहीयेत, सुट्ट्या मॅच होतं नाहीयेत. त्यामुळे तारेवरची कसरत आहे. पण थोडा काळ ती करावी लागेल. त्याची तयारी आमची आहे. शेवटी काम महत्त्वाचं आहे. त्याच्यानंतर बाकीच्या गोष्टी येतील,” असं अंबर म्हणाला.
