‘तारक मेहता का उल्टा चष्मा’ फेम अभिनेता गुरुचरण सिंग २२ एप्रिलपासून बेपत्ता होता. २६ एप्रिलला अभिनेत्याच्या वडिलांनी पोलिसांत तक्रार दिली होती, तेव्हापासून त्याचा शोध सुरू होता, आता अखेर हा शोध संपला आहे. कारण गुरुचरण सिंग घरी परतला आहे. तो शुक्रवारी (१७ मे रोजी) घरी परत आल्याची माहिती पोलिसांनी दिली आहे.
गुरुचरण सिंग २२ एप्रिलला मुंबईला जाणार होता. तो घरातून दिल्ली विमानतळावर जाण्यासाठी निघाला, पण तो पोहोचलाच नाही. गुरुचरणची मैत्रीण भक्ती सोनी त्याला मुंबई विमानतळावर घ्यायला गेली होती, पण तो आलाच नसल्याचं कळालं. त्यानंतर त्या सर्वांनी आधी अभिनेत्याचा शोध घेतला, पण काहीच माहिती मिळू शकली नाही. नंतर गुरुचरणचे वडील मदतीसाठी पोलिसांकडे गेले. पोलीसही मागच्या २२ दिवसांपासून अनेक राज्यांमध्ये त्याचा शोध घेत होते, पण गुरुचरण शुक्रवारी स्वतःच घरी आला आहे.
कुठे होता गुरुचरण सिंग?
पोलिसांनी दिलेल्या माहितीनुसार, घर व आई -वडिलांना सोडून तो धार्मिक प्रवासावर गेला होता, असं गुरुचरण सिंगने चौकशीदरम्यान अधिकाऱ्यांना सांगितलं. जवळपास २५ दिवसांत तो अमृतसर आणि लुधियाना सारख्या अनेक शहरांतील गुरुद्वारांमध्ये थांबला होता, पण नंतर आपण घरी जायला पाहिजे याची त्याला जाणीव झाली आणि तो घरी परतला, असं पोलिसांनी सांगितलं. यासंदर्भात ‘इंडिया टुडे’ने वृत्त दिलं आहे.
पोलिसांनी मुंबईत तारक मेहता..च्या सेटला दिली होती भेट
बेपत्ता गुरुचरणला शोधण्यासाठी दिल्ली पोलीस मुंबईत ‘तारक मेहता का उल्टा चष्मा’ मालिकेच्या सेटवर गेले होते. “ते मालिकेच्या सेटवर आले होते. ते माझ्याशी गुरुचरणबद्दल बोलले आणि मी त्यांना सांगितलं की तीन महिन्यांपूर्वी एका मॉलमध्ये आमची भेट झाली होती. आम्ही त्या दिवशी थोडं बोललो होतो आणि नंतर एकमेकांना दिवाळीच्या शुभेच्छा दिल्या होत्या. अधिकाऱ्यांना गुरुचरणच्या सह-कलाकारांशी बोलायचं होतं,” असं मालिकेचे प्रोजेक्ट हेड सोहेल रमाणी यांनी सांगितलं होतं.
दरम्यान, दिल्ली पोलिसांच्या पथकांनी दिल्ली आणि मुंबईतील ५० हून अधिक लोकांचे जबाब घेतले होते. याव्यतिरिक्त, त्यांनी अभिनेत्याचा शोध घेण्यासाठी हरियाणा, पंजाब आणि उत्तराखंड या राज्यातही तपास केला होता. पण अभिनेता पंजाबमध्ये होता आणि तिथून स्वतःच घरी परतला आहे.
