Pravin Tarde Post For Suraj Chavan: बिग बॉस मराठीच्या पाचव्या पर्वाचा विजेता सूरज चव्हाण (Bigg Boss Marathi 5 Winner Suraj Chavan) ठरला. टीव्हीवरील या लोकप्रिय रिअॅलिटी शोचा ग्रँड फिनाले रविवारी (६ ऑक्टोबरला) दणक्यात पार पडला. सर्व स्पर्धकांना मागे टाकत सूरज चव्हाणने बाजी मारली, तर गायक अभिजीत सावंत उपविजेता ठरला. सूरजने हा शो जिंकल्यावर अनेक सेलिब्रिटी आणि राजकीय नेते पोस्ट करून त्याला शुभेच्छा देत आहेत. दिग्दर्शक, अभिनेते प्रवीण तरडेंनी सूरजसाठी पोस्ट केली आहे.
प्रवीण तरडे यांनी फेसबूकवर सूरज चव्हाण बिग बॉस मराठीच्या पाचव्या पर्वाचा विजेता झाल्यावर पोस्ट केली आहे. त्यांनी सूरजचा ट्रॉफीबरोबरचा एक फोटो शेअर करत लिहिलं, “सूरज मित्रा तु फक्त ट्रॅाफी नाही तर सगळ्यांची मनंसुद्धा जिंकलीस. साधेपणा, सच्चेपणा कायम येक नंबरच राहतो हे पुन्हा एकदा सिद्ध झालं.”
हेही वाचा – Bigg Boss Marathi 5 चा विजेता सूरज चव्हाणसाठी सुप्रिया सुळेंची पोस्ट, म्हणाल्या, “आपल्या बारामतीचा…”
बारामतीच्या सूरज चव्हाणने या शोमधील ७० दिवसांच्या प्रवासानंतर बिग बॉसचे विजेतपद पटकावले. अभिजीत सावंत, निक्की तांबोळी, धनंजय पोवार, सूरज चव्हाण, जान्हवी किल्लेकर व अंकिता प्रभू वालावलकर हे बिग बॉसमधील टॉप ६ स्पर्धक होते. यांच्यापैकी सर्वात आधी जान्हवी किल्लेकरने ९ लाख रुपये रोख घेऊन शो सोडला.
हेही वाचा – Bigg Boss Marathi 5 चा उपविजेता ठरलेल्या अभिजीत सावंतची पहिली पोस्ट; म्हणाला, “मला जे वाटतंय ते…”
जान्हवीनंतर अंकिता प्रभू वालावलकर घराबाहेर गेली, त्यानंतर डीपी म्हणजेच धनंजय पोवार विजेत्याच्या शर्यतीतून बाद झाला. त्यानंतर निक्की तांबोळी, अभिजीत सावंत, सूरज चव्हाण हे टॉप ३ ठरले. त्यापैकी निक्की घराबाहेर पडली आणि सूरज चव्हाण व अभिजीत सावंत टॉप २ होते. जास्त मतं मिळाल्याने अभिजीतला मागे टाकत सूरज चव्हाण या पर्वाचा विजेता ठरला.
बिग बॉस मराठीच्या पाचव्या पर्वाच्या विजेत्याची घोषणा झाल्यानंतर सगळीकडे सूरज चव्हाणचीच चर्चा आहे. सूरजवर कौतुकाचा आणि शुभेच्छांचा वर्षाव होत आहे. अगदी लिहिता-वाचता येत नसलेल्या सूरजने ७० दिवसांच्या प्रवासात साधेपणाने प्रेक्षकांची मनं जिंकली आणि या शोची ट्रॉफी जिंकली.
