अभिनेत्री स्वानंदी टिकेकरने २३ जुलै रोजी गायक आशिष कुलकर्णीशी साखरपुडा उरकला. सध्या तिच्या साखरपुड्याची आणि लग्नाची जोरदार चर्चा आहे. स्वानंदी ही ज्येष्ठ अभिनेते उदय टिकेकर आणि सुप्रसिद्ध शास्त्रीय गायिका आरती अंकलीकर-टिकेकर यांची कन्या आहे. तिचं लग्न कधी होणार याबाबत तिचे वडील उदय टिकेकर यांनी माहिती दिली.
साखरपुडा झाला, लग्न कधी करणार? स्वानंदी टिकेकर म्हणाली, “आमच्या आयुष्यातील एका…”
स्वानंदी व आशिषचा साखरपुडा झाल्यानंतर त्यांचं लग्न कधी होणार, याची चाहत्यांमध्ये खूप उत्सुकता आहे. स्वानंदीने अजुन त्याबाबत सांगितलेलं नाही, लवकरच लग्नबंधनात अडकणार असल्याचं ती म्हणाली होती. मात्र तिच्या वडिलांनी लग्न कधी व कुठे होणार याबाबत सांगितलं आहे. उदय टीकेकर म्हणाले, “स्वानंदी व आशिष यांचं लग्न डिसेंबरमध्ये होईल. त्यांचं लग्न पुण्यातच होईल. आम्हीही पुण्याचेच आहोत आणि आशिषचं कुटुंबही पुण्याचं आहे. मी कामानिमित्त मुंबईत असतो. लग्नाचं ठिकाण पुणे असेल पण लोकेशन खूप सुंदर असेल.”
मुलीच्या लग्नाबद्दल त्यांच्या भावना उदय टिकेकर यांनी सांगितल्या. “मुलगी लग्न करून जाईल त्यामुळे भावुक होणार नाही. कारण आम्ही तिघेही आतापर्यंत एकमेकांपासून कामानिमित्त दूर जायचो. मी भावुक होतोय कारण ती खूप चांगल्या लोकांमध्ये जाणार आहे. मुलगा खूप चांगला आहे. बाप्पाची कृपा आहे की तिला चांगलं कुटुंब आणि चांगला मुलगा मिळाला आहे, त्यांनाही चांगली मुलगी मिळाली आहे. या गोष्टीमुळे मी खूप भावुक होत आहे,” असं उदय टिकेकर म्हणाले.
स्वानंदी ‘दिल दोस्ती दुनियादारी’ या मालिकेसाठी विशेष ओळखली जाते. ‘अस्सं माहेर नको गं बाई’, “अगं अगं सुनबाई…” या मालिकेत स्वानंदीने मुख्य भूमिका केल्या होत्या. तर आशिष ‘इंडियन आयडॉल’मध्ये दिसला होता.
