मराठी कलाविश्वातील असंख्य कलाकारांनी हिंदी मालिका व चित्रपटांमध्ये आपली वेगळी ओळख निर्माण केली आहे. मराठमोळी लोकप्रिय अभिनेत्री आणि अभिनेता सुयश टिळक याची पत्नी आयुषी भावे-टिळक लवकरच लोकप्रिय हिंदी मालिकेत महत्त्वाची भूमिका साकारणार आहे. आयुषीने यापूर्वीही हिंदी कलाविश्वात काम केले आहे.
गेल्या काही दिवसापांसून ‘नीरजा – एक नई पहचान’ या ‘हिंदी कलर्स’ वाहिनीवरील मालिकेची चांगलीच चर्चा सुरु आहे. या मालिकेत आयुषी भावे महत्त्वाच्या भूमिकेत दिसणार आहे. सध्या बालकलाकार मायरा वायकुळ मालिकेत ‘नीरजा’च्या बालपणीची व्यक्तिरेखा साकारत असून, नीरजा मोठी झाल्यावर प्रेक्षकांना या भूमिकेत अभिनेत्री आस्था शर्मा दिसेल. आयुषीची एण्ट्री मालिकेत ‘नीरजा’ मोठी झाल्यावर होणार आहे. ती मालिकेत ‘मुनमुन’ हे नीरजाच्या वहिनीचे पात्र साकारणार आहे.
आयुषी भावेने ‘लोकसत्ता’शी संवाद साधताना तिच्या भूमिकेबाबत माहिती दिली. अभिनेत्री म्हणाली, “‘नीरजा – एक नई पहचान’ मालिकेत मी नीरजा मोठी झाल्यावर तिच्या वहिनीची म्हणजेच ‘मुनमुन’ ही भूमिका साकारणार आहे. ‘मुनमुन’ चे पात्र काहीसे विनोदी आणि नकारात्मक असेल, पण प्रत्यक्षात ती फार हुशार असते. नीरजा आणि अबीर यांच्या प्रेमकहाणीत अडथळे आणण्याचे काम मुनमुन करणार आहे. किचन पॉलिटिक्स, घरातील सत्ता कोणाकडे जाणार? यामध्ये मुनमुन जास्त सहभागी असेल.” तसेच ‘नीरजा – एक नई पहचान’ या मालिकेबाबत ती प्रचंड उत्सुक असल्याचे तिने सांगितले.
दरम्यान, अलीकडेच आयुषीने तिचा वाढदिवस साजरा केला. इन्स्टाग्राम पोस्ट, स्टोरीज शेअर करत तिने तिच्या नव्या मालिकेबाबत प्रेक्षकांना माहिती दिली. लाडक्या बायकोच्या वाढदिवसानिमित्त अभिनेता सुयश टिळकनेही खास पोस्ट शेअर करत आयुषीला शुभेच्छा दिल्या होत्या.
