काही महिन्यांपूर्वी झी मराठीवर ‘लोकमान्य’ ही मालिका सुरू झाली. ही मालिका लोकमान्य टिळकांच्या जीवनावर आधारित आहे. परंतु ही मालिका प्रेक्षकांचा निरोप घेणार असल्याचं काही दिवसांपूर्वीच समोर आलं. आता या मालिकेतील एक नवीन गाणं प्रेक्षकांसमोर आलं आहे. विशेष म्हणजे हे गाणं स्पृहा जोशीने लिहिलं आहे.
या मालिकेत अभिनेता क्षितिष दाते याने लोकमान्य टिळकांची भूमिका साकारली आहे, तर अभिनेत्री स्पृहा जोशीने लोकमान्य टिळकांची पत्नी सत्यभामाबाई यांची भूमिका साकारली आहे. तर आता या मालिकेसाठी अभिनेत्री बरोबरच स्पृहा गीतकारही झाली आहे.
आणखी वाचा : “मराठी भाषेतून शिकणारी मुलं…”, स्पृहा जोशीने मांडलं स्पष्ट मत, म्हणाली…
आज ‘लोकमान्य’ या मालिकेच्या टीमने मालिकेसाठी तयार करण्यात आलेलं एक गाणं प्रदर्शित केलं. या गाण्यातून लोकमान्य टिळकांचा जीवनप्रवास दिसत आहे.
“विझत चालल्या या भूमीला स्वराज्य हा उद्गार दिला,
मरू घातल्या लाख मनांना अभिमानाचा श्वास दिला…”
असे या गाण्याचे शब्द आहेत. या गाण्यातून लोकमान्य टिळकांचं संपूर्ण कार्य प्रेक्षकांसमोर उलगडतं. हे गाणं स्पृहाने लिहिलं असून शुभंकर शेंबेकर याने सांगीतिबद्ध केलं आहे. तर जयदीप वैद्यने हे गाणं गायलं आहे.
हे गाणं सोशल मीडियावरून समोर येताच या गाण्याचं चाहत्यांबरोबरच अनेक कलाकारही कौतुक करत आहेत. हे गाणे ऐकत असताना खरोखरच अंगावर शहारा आला अशा प्रतिक्रिया नेटकरी देत आहेत. तर दुसरीकडे, या आठवड्यात शनिवारी ही मालिका प्रेक्षकांचा निरोप घेणार असल्याने या मालिकेचे प्रेक्षक दुःख व्यक्त करत आहेत.
