रणबीर कपूरची प्रमुख भूमिका असलेल्या ‘अ‍ॅनिमल’ चित्रपटाची गेल्या काही दिवसांपासून जोरदार चर्चा सुरू आहे. ‘अ‍ॅनिमल’चं दिग्दर्शन ‘कबीर सिंग’ फेम संदीप रेड्डी वांगाने केलं आहे. आतापर्यंत चित्रपटाने बॉक्स ऑफिसवर रेकॉर्डब्रेक कामगिरी करत तब्बल ७०० कोटींहून अधिक कमाई केली आहे. या चित्रपटातील बरीच गाणी सध्या सोशल मीडियावर व्हायरल होत आहे. यामध्ये बॉबी देओलच्या एन्ट्रीचं ‘जमाल जमालो कुडू’ हे गाणं विशेष लक्ष वेधून घेतं. या गाण्यावर आता मराठी कलाविश्वातील लोकप्रिय जोडी अविनाश व ऐश्वर्या नारकरांनी जबरदस्त डान्स केला आहे.
अविनाश व ऐश्वर्या नारकर सोशल मीडियावर प्रचंड सक्रिय असतात. विविध गाण्यांवर डान्स करून ते दोघंही त्यांच्या चाहत्यांचं मनोरंजन करतात. या दोघांचा फिटनेस आजच्या तरुणपिढीला लाजवेल असाच आहे. नारकर जोडप्याने नुकताच बॉबी देओलचं एन्ट्री गाणं ‘जमाल कुडू’वर अभिनेत्री अश्विनी कासारसह जबरदस्त डान्स केला आहे. त्यांचं रिल इन्स्टाग्रामवर मोठ्या प्रमाणात व्हायरल होत असून या व्हिडीओला अवघ्या तासांतच दीड लाखांहून अधिक व्ह्यूज आले आहेत.
नारकरांनी या व्हिडीओला “आम्ही आनंदी असल्याने डान्स करत आहोत” असं कॅप्शन दिलं आहे. या व्हिडीओमध्ये तिघांनीही हुबेहूब स्टेप्स केल्याचं पाहायला मिळत आहे. नेटकऱ्यांनी या व्हिडीओवर कौतुकाचा वर्षाव केला आहे. एका युजरने, “सगळं लक्ष अविनाश नारकर साहेबांनी वेधून घेतलं” अशी कमेंट केली आहे. दुसऱ्या एका युजरने या व्हिडीओवर “ऐश्वर्या आणि अविनाश यांच्या स्टेप्स एकदम परफेक्ट आहेत” असं म्हटलं आहे. आणखी काही युजर्सनी “तिघेही छान नाचले, तुमच्याकडून खूप काही शिकण्यासारखं आहे ” अशी प्रतिक्रिया या व्हिडीओवर दिली आहे.
हेही वाचा : “माझ्या सगळ्या स्किटमध्ये…”, गौरव मोरेने सांगितलं ‘महाराष्ट्राची हास्यजत्रा’ मधून ब्रेक घेण्याचं कारण
दरम्यान, ऐश्वर्या व अविनाश नारकरांच्या कामाबद्दल सांगायचं झालं, तर सध्या ते दोघंही छोट्या पडद्यावरील लोकप्रिय मालिकांमध्ये महत्त्वाची भूमिका साकारत आहेत. याशिवाय सोशल मीडियावर सक्रिय राहत ते दोघंही चाहत्यांचं भरभरून मनोरंजन करतात.
