Aishwarya And Avinash Narkar Dance Video : अभिनेत्री ऐश्वर्या नारकर आणि अभिनेते अविनाश नारकर यांनी आपल्या अभिनयाबरोबर डान्स कौशल्याने अनेकांची मनं जिंकली आहेत. एव्हरग्रीन कपल असं ऐश्वर्या-अविनाश नारकरांना म्हटलं जातं. ५० वय ओलांडूनही त्यांची एनर्जी ही तरुणाईला लाजवेल अशी असते. त्यामुळे त्यांच्या डान्स व्हिडीओचं नेहमीच कौतुक होतं असतं. सध्या ऐश्वर्या-अविनाश नारकरांच्या रोमँटिक डान्स व्हिडीओने सगळ्यांचं लक्ष वेधलं आहे.
ऐश्वर्या-अविनाश नारकर सोशल मीडियावर खूप सक्रिय असतात. आपले नवनवीन फोटो, व्हिडीओ शेअर करत असतात. तसंच सोशल मीडियावरील ट्रेंडदेखील फॉलो करत असतात. सध्या सोशल मीडियावरील युझर्स सुशांत सिंह राजपूत आणि अनुष्का शर्माचं ‘चार कदम’ गाण्यावर रील व्हिडीओ करताना दिसत आहेत. त्यामुळेच हे गाणं ट्रेंडमध्ये आहे. याच गाण्यावर ऐश्वर्या-अविनाश नारकरांनी रोमँटिक डान्स केला आहे.
अभिनेत्री ऐश्वर्या नारकरांनी रोमँटिक डान्स व्हिडीओ इन्स्टाग्रामवर शेअर केला आहे. हा व्हिडीओ शेअर करताना त्यांनी हार्ट इमोजी कॅप्शनमध्ये दिले आहेत. या व्हिडीओमध्ये ऐश्वर्या-अविनाश नारकर ‘चार कदम’ गाण्यावर सुंदर रोमँटिक डान्स करताना दिसत आहेत. दोघांचा हा रोमँटिक डान्स व्हिडीओ सध्या खूप चर्चेत आला आहे.
ऐश्वर्या-अविनाश नारकरांच्या या डान्स व्हिडीओवर अनेक नेटकऱ्यांनी प्रतिक्रिया दिल्या आहेत. ‘निखळ आनंदी जोडपं’, ‘मस्तच’, ‘अविनाश सर नेहमीच भारी नाचतात’, ‘तुम्ही दोघे खूप गोड आहात’, ‘मस्त जोडी…तुम्ही एकमेकांसाठीच बनला आहात’, अशा प्रतिक्रिया नेटकऱ्यांच्या उमटल्या आहेत.
दरम्यान, ऐश्वर्या-अविनाश नारकरच्या कामाबद्दल बोलायचं झालं तर, अलीकडेच ऐश्वर्या यांची लोकप्रिय मालिका ‘सातव्या मुलीची सातवी मुलगी’ने प्रेक्षकांचा निरोप घेतला. या मालिकेत त्यांनी साकारलेली खलनायिका चांगलीच गाजली. तसंच अविनाश नारकर सध्या ‘लग्नानंतर होईलच प्रेम’ या मालिकेत पाहायला मिळत आहेत. या मालिकेत त्यांनी विक्रमादित्य देशमुखची भूमिका साकारली आहे. याशिवाय त्यांचं ‘पुरुष’ नावाचं नाटक रंगभूमीवर जोरदार सुरू आहे. जयवंत दळवी यांच्या जन्मशताब्दी निमित्त विशेष ५० प्रयोग या नाटकाचे होणार आहेत.
