सध्या ‘कौन बनेगा करोडपती’ या लोकप्रिय कार्यक्रमाचे १४ वे पर्व सुरु आहे. मागील अनेक वर्षांपासून अमिताभ बच्चन या कार्यक्रमामध्ये सूत्रसंचालन करत आहेत. हॉटसीटवर बसलेल्या व्यक्तीशी गप्पा मारत ते हा बुद्धीचातुर्याचा खेळ पुढे नेत असतात. यामुळे स्पर्धकाचा आत्मविश्वास वाढतो आणि प्रेक्षकांचे अधिक मनोरंजन होते. अनेकदा ते चित्रपट, काम, सिनेसृष्टी अशा विषयांवर बोलताना त्याच्या आयुष्यातले किस्से सांगू लागतात. असाच एक गमतीदार किस्सा त्यांनी ‘केबीसी’च्या एका भागामध्ये सांगितला. या भागामध्ये त्यांच्यासमोर साहिल शिंदे नावाचा स्पर्धक बसला होता.
या भागाचा प्रोमो व्हिडीओ सोनी टिव्ही वाहिनीच्या इन्स्टाग्राम हँडलवर नुकताच पोस्ट करण्यात आला. खेळ सुरु असताना अमिताभ यांनी शाळेतली आठवण सांगितली. ते म्हणाले, “माझ्या बहिणीची शाळा माझ्या शाळेपासून काहीशा अंतरावर असलेल्या टेकडीवर होती. या दोन टेकड्यांमध्ये दरी होती. तेव्हा दरी ओलांडून मी त्या शाळेमध्ये माझ्या प्रेयसीला शोधायला जायचो.” हे ऐकून उपस्थित प्रेक्षक हसायला लागले. साहिलने देखील यावर प्रतिक्रिया दिली. ‘तुम्ही तर प्लेयर आहात सर’, असे तो म्हणाला. यावर बिग बी काहीसे लाजले.
त्यानंतर त्यांनी साहिलला ‘तुमच्या आयुष्यात कोणी आहे का?’ असे हसत विचारले. तेव्हा लाजत त्याने ‘नाही सर’ म्हटले. पुढे स्क्रीनवर साहिलच्या मित्रांचा व्हिडीओ सुरु झाला. त्यांनी ‘साहिलच्या आयुष्यामध्ये एक मुलगी आहे’ असे म्हणत त्याचे गुपित सर्वांना सांगितले. व्हिडीओ संपल्यावर अमिताभ त्याला उद्देशून “महोदय या मंचावर खोटं बोलायचं नसतं. चला तर सांगून टाका कोण आहे ती भाग्यशाली व्यक्ती”, असे म्हणाले. हे ऐकल्यावर साहिल पुन्हा एकदा लाजला.
मध्यंतरी एका भागामध्ये अमिताभ यांनी त्यांच्या ‘मुकद्दर का सिंकदर’ या चित्रपटाच्या चित्रीकरणादरम्यानचा किस्सा सांगितला होता. या चित्रपटाच्या एका दृश्यामध्ये त्यांना विनोद खन्नांच्या तोंडावर ग्लासामध्ये असलेले पाणी फेकायचे होते. पण अनावधानाने काचेचा ग्लास त्यांच्या हातामधून निसटला आणि विनोद यांच्या हनुवटीवर आदळला. त्या अपघातामध्ये त्यांच्या हनुवटीवर काही टाके पडले होते.
