“तुझी भक्ती आणि तुझी देवीआई दोघीही आंधळ्या…”, अनुष्काच्या वक्तव्यानंतर अहिल्यादेवीने उचलले मोठे पाऊल; म्हणाली, “आता ती पूर्ण उद्ध्वस्त…”

अनुष्का आणि अहिल्यादेवी एकमेकींविरोधात उभ्या ठाकणार

झी मराठी वाहिनीने पारू या मालिकेचा प्रोमो इन्स्टाग्रामवर शेअर केला आहे. या प्रोमोच्या सुरुवातीला पाहायला मिळते की, किर्लोस्करांच्या घरात आदित्य, प्रीतम, श्रीकांत, प्रिया, दामिनी, पारू, अहिल्यादेवी व अनुष्का एकत्र जमलेले आहेत. अहिल्यादेवी अनुष्काला म्हणते, “तुला मी एक संधी दिली होती; पण ती तू गमावलीस. आता पुढे जे काही होईल, त्या परिणामांना सामोरी जायला तयार राहा.” त्यानंतर अनुष्का पारूजवळ जाते आणि तिला म्हणते, “पारू माझी शंका खरी ठरली. तुझी भक्ती आणि तुझी देवीआई दोघीही आंधळ्या आहात. देव तुमच्या दोघींनाही सारासार विचार करण्याची बुद्धी देवो.” असे म्हणून अनुष्का निघून जाते. त्यानंतर अहिल्यादेवी किर्लोस्कर फोन करते आणि सांगते, “मोहन आपण जे अनुष्काच्या बाबतीत करायचं ठरवलं होतं. गो अहेड. आता ती पूर्ण उद्ध्वस्त होईपर्यंत मी थांबणार नाही.”

हा प्रोमो शेअर करताना झी मराठी वाहिनीने, “अहिल्या अनुष्काला उद्ध्वस्त करणार का?”, अशी कॅप्शन दिली आहे.

मालिकेत दाखविल्याप्रमाणे, अनुष्काने पारूला तू घरकाम करण्यात तुझं टॅलेंट वाया घालवत आहेस, असे म्हटले होते. त्यावेळी तिथे अहिल्यादेवी किर्लोस्करसुद्धा होती. अनुष्काचे हे बोलणे तिला आवडले नाही. तिचा अहंकार दुखावला गेला. त्यानंतर अहिल्यादेवीने अनुष्काला सगळ्या प्रोजेक्टमधून काढले. तिच्या ऑफिसवर इन्कम टॅक्सची धाड पडावी याची व्यवस्था केली. थोडक्यात तिला सर्व बाजूंनी अडचणीत आणले. तिचे हे वागणे, तिची मुले आदित्य व प्रीतम यांना आवडत नसल्याचे पाहायला मिळत आहे. पारू अहिल्यादेवीला देवी मानत असल्याने ती करेल, ते सर्व बरोबर, असे तिला वाटते. त्यामुळे ती इतरांनाही अहिल्यादेवी जे करतेय, ते विचार करून करीत असेल, असे सांगते.

हेही वाचा: Video: आणखी एका नव्या मालिकेची घोषणा, दमदार प्रोमो होतोय व्हायरल; ‘ही’ अभिनेत्री झळकणार मुख्य भूमिकेत

दरम्यान, आता अनुष्काच्या बोलण्याचा पारूवर परिणाम होणार का, अहिल्यादेवीला तिची चूक समजणार का, आदित्य व प्रीतम त्यांच्या आईच्या विरोधात जाणार का, अनुष्का पुढे काय करणार, हे पाहणे महत्त्वाचे ठरणार आहे. मालिकेत पुढे काय होणार, हे पाहण्यासाठी प्रेक्षक उत्सुक असल्याचे पाहायला मिळत आहे.