Badlapur School Case : कोलकाता येथे काही दिवसांपूर्वीच प्रशिक्षणार्थी महिला डॉक्टरावर बलात्कार होऊन तिची हत्या करण्यात आल्याची घटना घडली होती. या विरोधात देशभरात संतापाची लाट उसळली असतानाच आता बदलापूरमधल्या शाळेतलं आणखी एक धक्कादायक प्रकरण उघडकीस आलं आहे. बदलापूर येथे शाळेच्या स्वच्छतागृहात ४ व ६ वर्षांच्या दोन मुलींवर लैंगिक अत्याचाराची घटना घडली आहे. हे प्रकरण उघडकीस आल्यावर संतप्त नागरिकांनी आज ( २० ऑगस्ट ) सकाळपासून रस्त्यावर उतरून आंदोलन करण्यास सुरुवात केली.
शाळेत घडलेल्या लैंगिक अत्याचाराचं ( Badlapur School Case ) प्रकरण समोर आल्यावर संतप्त नागरिकांनी बदलापूरच्या रुळांवर उतरून रेल्वे सेवा अडवून धरली. तसेच मुलींच्या सुरक्षेचं काय हा प्रश्न सातत्याने उपस्थित करत पोलीस, प्रशासकीय अधिकाऱ्यांना जाब विचारला. याबाबत आता महाराष्ट्राची हास्यजत्रा कार्यक्रमाचे दिग्दर्शक सचिन गोस्वामी यांनी पोस्ट शेअर करत आपलं मत मांडलं आहे.
हेही वाचा : Badlapur Sexual Assault Case : “…तर राज्यात पुन्हा अशी घटना घडणार नाही”, बदलापूर प्रकरणावरून उद्धव ठाकरेंचा राज्य सरकारला सल्ला
‘महाराष्ट्राची हास्यजत्रा’चे दिग्दर्शक सचिन गोस्वामी यांची बदलापूर प्रकरणावर पोस्ट
“बदलापूरमध्ये सामान्य माणसांचा उद्रेक हा कायदा, सुरक्षा आणि न्याय प्रक्रियेवरचा विश्वास उडत चालल्याचे लक्षण आहे. निर्भया कांड, बंगालमधील डॉक्टरवरील अत्याचार… हाथरस घटना, मणिपूर, भातमोगे परिवारावरील अत्याचार अशा अनेक घटना… त्यात असलेला राजकीय नाकर्तेपणा, तपास यंत्रणांची दिरंगाई आणि न्यायास अक्षम्य विलंब यातून निर्माण होणारं नैराश्य असा उद्रेक घडवत आहे. शांततापूर्ण जगणाऱ्या सामान्य माणसाला दगड हाती घ्यावासा वाटणं हे पुढील उद्रेकाची नांदी आहे. कायदा ,सुव्यवस्था, न्याययंत्रणा तत्पर आणि वेगवान होणं गरजेचं आहे…घडतंय ते भयंकर आहे…क्लेशदायक आहे.” असं मत सचिन गोस्वामी यांनी बदलापूर प्रकरणावर मांडलं आहे.
मराठी कलाकारांच्या संतप्त प्रतिक्रिया
दरम्यान, बदलापूर प्रकरणावर ( Badlapur School Case ) नेहा शितोळे, मृण्मयी देशपांडे, अभिजीत केळकर, शिवाली परब, प्रसाद ओक या मराठी कलाकारांनी सुद्धा पोस्ट शेअर करत आपलं मत मांडलं आहे. याशिवाय या कलाकारांनी संताप व्यक्त करत लवकरात लवकर आरोपींना शिक्षा व्हावी अशी मागणी देखील केली आहे.
© IE Online Media Services (P) Ltd