हिंदी 'बिग बॉस'च्या १६व्या पर्वाला काही दिवसांपूर्वीच सुरुवात झाली. या शोच्या पहिल्या आठवड्यापासूनच स्पर्धकांमध्ये भांडण, राडे झाले. 'बिग बॉस १६'चा दुसरा आठवडाही चांगलाच गाजणार असल्याची चिन्ह दिसत आहेत. प्रत्येक खेळ जिंकण्यासाठी घरातील स्पर्धक कोणत्याही थराला जाऊ शकतात हे पुन्हा एकदा नव्या भागामध्ये सिद्ध झालं आहे. स्पर्धक शालीन भानोतने महिला स्पर्धकाला खेळादरम्यान धक्का दिल्याने त्याला घरामधून बाहेर काढा अशी मागणी होत आहे. नेमकं काय घडलं?स्पर्धक निमृत कौर अहलूवालिया कॅप्टन पदावरून हटवण्यात आलं. त्यानंतर कॅप्टन पदासाठी सगळ्या स्पर्धकांना टास्क देण्यात आला. घराच्या गार्डन परिसरामध्ये जाऊन सगळ्यात आधी जो हॉर्न वाजवेल तोच कॅप्टन बनण्यासाठी योग्य ठरेल असं ठरलं. यावेळी शिव ठाकरे व गौतम विगने सगळ्यात आधी हॉर्न वाजवला. यादरम्यान स्पर्धकांना शिव व गौतमला समर्थन द्यायचं होतं. शिववर राग काढण्यासाठी शालीनने त्याला त्रास देण्यास सुरुवात केली. यावेळी शिवची मैत्रिण अर्चना गौतम शालीनला हे कृत्य करण्यापासून थांबवू लागली. हे सगळं सुरु असताना अर्चनाला शालीनचा धक्का लागला आणि तिला किरकोळ दुखापत झाली. यावरून तिने राडा करण्यास सुरुवात केली. शालीनला घराबाहेर काढा अशी मागणी करू लागली. पण शालीनच्या बाजूने मराठमोळी अभिनेत्री ऋता दुर्गुळेने आपलं मत व्यक्त केलं आहे. आणखी वाचा - खासगी MMS व्हिडीओ लीक झाल्यानंतर सुप्रसिद्ध अभिनेत्रीची पहिली प्रतिक्रिया, म्हणाली, “तुमच्या आई-बहिणींबरोबर…” तिने इन्स्टाग्राम अकाऊंटद्वारे पोस्ट शेअर करत म्हटलं की, "एखाद्याला जाणीवपूर्वक त्रास देणाऱ्यांमध्ये शालीन भानोत नाही. त्याच जिद्दीने तो पुन्हा परतणार हे नक्की." ऋताचं हे वक्तव्य सध्या चर्चेत आहे. सोशल मीडियावरही काहींनी शालीनला पाठिंबा दिला आहे. तर काहींनी त्याने केलेलं कृत्य चुकीचं असल्याचं म्हटलं आहे.
