मनोरंजनसृष्टीतील सगळेच कलाकार सोशल मीडियाच्या माध्यमातून चाहत्यांच्या संपर्कात राहतात. आपल्या लाडक्या कलाकाराच्या वैयक्तिक जीवनाबद्दल जाणून घेण्याची उत्सुकता प्रत्येक चाहत्याच्या मनात असते. विशेषत: सेलिब्रिटींचे बालपणीचे फोटो सोशल मीडियावर सर्वाधिक व्हायरल होतात. यापूर्वी अनेक मराठी कलाकारांनी इन्स्टाग्रामवर बालपणीचे फोटो शेअर करत जुन्या आठवणींना उजाळा दिला होता. आता यात आणखी एका अभिनेत्रीची भर पडली आहे.
हेही वाचा : प्रेमाची जाहीर कबुली दिल्यावर मीरा जोशीने सांगितली लग्नाची तारीख! कोण आहे अभिनेत्रीचा होणारा नवरा?
नाटक, चित्रपट, रिअ‍ॅलिटी शोमध्ये काम करून ही अभिनेत्री महाराष्ट्राच्या घराघरांत लोकप्रिय झाली आहे. बिग बॉस मराठीच्या चौथ्या पर्वात या अभिनेत्रीने सहभाग घेतला होता. या कार्यक्रमात तिने ‘पुण्याची टॉकरवडी’ अशी स्वत:ची वेगळी ओळख निर्माण केली होती. बिग बॉसमुळे अभिनेत्रीला खऱ्या अर्थाने प्रसिद्धी मिळाली. लवकरच ती जवळच्या मित्राबरोबर लग्नबंधनात अडकणार आहे.
हेही वाचा : “दिग्दर्शक म्हणून सुबोध भावे चांगला की प्रसाद ओक?” अमृता खानविलकरने दिलं स्पष्ट उत्तर, म्हणाली…
ओनम सणानिमित्त अभिनेत्रीने केरळ संस्कृतीचे दोन फोटो शेअर केले होते. यातील पहिल्या फोटोमध्ये तिने केरळची सिल्क साडी नेसली आहे. हा फोटो सध्याचा असून, दुसरा फोटो अभिनेत्रीच्या बालपणीचा आहे. ही लहान मुलगी दुसरी-तिसरी कोणी नसून ‘बिग बॉस’ फेम अभिनेत्री अमृता देशमुख आहे. बालपणीच्या फोटोमध्ये अमृताला ओळखणे फार कठीण आहे.
हेही वाचा : “मुलीवर प्रेम असल्याचं…”, करण जोहरने केला मोठा खुलासा; म्हणाला, “‘त्या’ शब्दामुळे नैराश्येत होतो”
अमृता देशमुखने शेअर केलेल्या फोटोवर नेटकऱ्यांनी कौतुकाचा वर्षाव केला आहे. ती लवकरच अभिनेता प्रसाद जवादेसह लग्न करणार आहे. बिग बॉसच्या घरात दोघांच्या डेटिंगच्या चर्चा रंगल्या होत्या. येत्या १८ नोव्हेंबरला अमृता आणि प्रसाद लग्नबंधनात अडकणार आहेत. दरम्यान, अमृता सध्या ‘नियम व अटी लागू’ या नाटकाच्या माध्यमातून प्रेक्षकांचे मनोरंजन करत आहे. तिने ‘तुमचं आमचं सेम असतं’ या मालिकेद्वारे मनोरंजन विश्वात पदार्पण केले होते.
